Лепшых прафесіяналаў чакае юбілейная «Тэлевяршыня»
Імёны пераможцаў X Нацыянальнага тэлевізійнага конкурсу «Тэлевяршыня» стануць вядомы 17 красавіка. Цырымонія ўзнагароджання лаўрэатаў пройдзе ў Палацы Рэспублікі.
Як адзначыў у час сустрэчы з журналістамі начальнік Упраўлення элек-тронных СМІ Міністэрства інфармацыі Уладзімір Ядранцаў, конкурс «Тэлевяршыня» не страчвае сваёй папулярнасці. У гэтым годзе на яго пададзена 238 заявак. З іх экспертамі былі ада-браны 76 лепшых работ, сярод якіх і вызначацца сёння ўвечары пераможцы ў 25 намінацыях. Па словах Уладзіміра Ядранцава, сёлетнія праграмы-прэтэндэнты настолькі моцныя, што, магчыма, па якой-небудзь з пазіцый, а то і не адной першыя месцы прыйдзецца падзяліць паміж двума канкурсантамі.
— Радуе, што з кожным годам усё большую цікавасць да «Тэлевяршыні» праяўляюць рэгіянальныя тэлерадыёкампаніі. Сёння яны ўжо па многіх пазі-цыях не саступаюць асобным праграмам цэнтральных каналаў. І трэба пры-знаць, у гледачоў сваіх рэгіёнаў карыстаюцца большай папулярнасцю, — сказаў Уладзімір Ядранцаў.
З меркаваннем аб тым, што сярод работ рэгіянальных тэлекампаній ёсць вартыя перамогі, згодны і член журы, загадчык кафедры тэлебачання і радыёвяшчання Інстытута журналістыкі Белдзярж-універсітэта Вячаслаў Булацкі. У прыватнасці, з’явай у тэлевізійным свеце, заўважанай і адзначанай прафесіяналамі галіны, назваў ён дакументальны фільм «Недзіцячы дзённік. Верасень 1943-га», зняты тэлерадыёкампаніяй «Магілёў».
Гэтую ж карціну самым лепшым, самым даходлівым і самым кранальным аповедам пра вайну назвала член журы, сцэнарыст, дацэнт Беларускай дзяржаўнай акадэміі мастацтваў Галіна Злабенка. У цэлым, на яе думку, дзясятая «Тэлевяршыня» аказалася самай высокай, якасны скачок адчуваецца і бачны ва ўсім, прачытваецца ў кожнай рабоце.
Зрэшты, усіх намінантаў арганізатары конкурсу не называюць да апошняга. Інтрыгу захоўваюць і вакол самой урачыстай цырымоніі ўзнагароджання, падрыхтоўкай якой займаўся тэлеканал АНТ. Па словах сцэнарыста цырымоніі, музычнага рэдактара «Радыё АНТ» Івана Падрэза, галоўная ідэя — перакінуць масток паміж мінулым і будучыняй. Не пакінуць без увагі традыцыі, колішніх і сённяшніх герояў айчыннага тэлебачання і пафантазіраваць, уявіць, якім будзе яно праз 10 ці нават праз 100 гадоў. У шоу будуць прысутнічаць элементы калянавуковай фантастыкі, візуальныя эфекты і іншыя сучасныя тэхналогіі. Арганізатары абяцаюць дзейства незабыўнае — з разбурэннем стэрэатыпаў, разрывам шаблонаў, нечаканымі хадамі і аб’яднаннем сцэны з глядзельнай залай.
— Галоўнае, да чаго мы імкнёмся, — каб у час цырымоніі ўсе адчувалі сябе ў сваёй талерцы, каб панавалі нязмушаная абстаноўка, сяброўская, цёплая атмасфера, калегіяльнасць і еднасць. Бо ўсе мы робім адну агульную справу, — гаворыць Іван Падрэз.
На ролю вядучых цырымоніі запрошаны многія вядомыя тэлеперсоны. Упершыню ў гэтым годзе кампанію ім складуць калегі з рэгіянальных тэлестудый. Удзел у шоу прымуць зоркі беларускай эстрады і спорту, а таксама кіраўнікі тэлегаліны, якія, па словах арганізатараў, паўстануць у незвычайных для сябе ролях.
Тэлеверсію падзеі ўвечары 19 красавіка пакажа канал АНТ.
