У гэтым сезоне запрацуе сістэма, якая будзе аўтаматычна лічыць веласіпедыстаў. Абсталяванне ўстановяць на ажыўленым участку магістральнай дарожкі.Па краіне калясіць каля 1,5 мільёна веласіпедаў. Больш за ўсё аматараў гэтага віду транспарту жыве ў Мінску — каля 800 тысяч. Па статыстыцы, гэта больш за 40 працэнтаў жыхароў сталіцы. Яно і зразумела: інфраструктура развітая. Галоўная веладарожка цягнецца праз увесь горад — гэта 27 кіламетраў задавальнення. Ёсць дзве прагулачныя веладарожкі даўжынёю 4,5 км, сумешчаныя пешаходна-веласіпедныя дарожкі — 188 км.
Продаж веласіпедаў расце ў сярэднім на 10—15 працэнтаў у год, але і арэндай карыстаюцца вельмі часта. Сістэма пракату развіваецца з кожным годам — у Мінску ў сезон працуюць каля 40 пунктаў, дзе можна на час узяць каля 1000 двухколавых.
Многія пункты пракату ўжо працуюць. Дарэчы, упершыню ў гэтым годзе такая паслуга з’явілася на мінскіх запраўках. Гадзіна пракату каштуе 5 рублёў, 2 гадзiны — 7,50, 5 гадзін — 13 рублёў. Суткі — 15, двое сутак — 25, трое — 35 рублёў. Начная велапрагулка з 19.00 да 24.00 абыдзецца ў 12 рублёў.
Ужо на наступным тыдні адкрываюцца самыя папулярныя сезонныя пункты пракату — на набярэжнай Свіслачы ў пачатку праспекта Пераможцаў, каля прыпынку «Камсамольскае возера» ля парку Перамогі. Там прапануюць не толькі веласіпеды — таксама лодкі, катамараны, ролікавыя канькі. У галоўным упраўленні спажывецкага рынку Мінгарвыканкама анансуюць: «Пункты пракату будуць працаваць з 12.00 да 22.00 па буднях і з 10.00 да 22.00 па выхадных».
Аляксандра Шышла, дырэктар УП «Адпачынак», агучыла «Р» прэйскурант:
— Арэнда дарослага веласіпеда на адну гадзіну каштуе 6 рублёў, дзіцячага — 4 рублі. У пракаце будзе даступны і дадатковы інвентар — велакрэсла, велазамкі, ролікі, гарадскія самакаты, а таксама дзіцячыя электрамабілі.
Зараз пункты рыхтуюцца да адкрыцця і абнаўляюць свае фонды. Уздоўж веладарожак таксама арганізуюць дадатковыя паслугі: рамонт веласіпедаў, гандаль напоямі і закускамі. Але гэта яшчэ не ўсё — у гэтым сезоне будуць і іншыя сюрпрызы. Напрыклад, з’явіцца выдзеленая паласа для веласіпедыстаў на праезнай частцы — гэта ўчастак на вуліцы Веры Харужай. Ідэя такая: звязаць праспект Незалежнасці з інтэнсіўным веласіпедным рухам у іншай частцы горада. Пілотны праект ДАІ і веласіпеднага таварыства знаходзіцца на апошнім этапе, зусім хутка яго рэалізуюць.
Павел Нішчанка, спецыяліст па развіцці інфраструктуры Мінскага веласіпеднага таварыства, расказвае пра іншыя навінкі:
— У гэтым сезоне запрацуе сістэма, якая будзе аўтаматычна лічыць веласіпедыстаў. Абсталяванне ўстановяць на ажыўленым участку магістральнай дарожкі. Яно будзе адсочваць дынаміку росту колькасці тых, хто рухаецца на двухколавіках.
А лічба, як прагназуюць спецыялісты, будзе няўхільна расці. EuroVelo, праект Еўрапейскай федэрацыі веласіпедыстаў, — адна з прычын. Сутнасць такая: дзясяткі тысяч аматараў велатурызму штогод падарожнічаюць па 14 веламаршрутах. Да 2020 года агульны кіламетраж EuroVelo дасягне 70 тысяч кіламетраў. А зараз турысты змогуць прыехаць і да нас! Нашу краіну новы веламаршрут перасякае наскрозь — ад мяжы з Польшчай да мяжы з Расіяй. Праходзіць праз казачныя лясы і пушчы, невялікія гарады і прыводзіць у самае сэрца — Мінск.
Продажы веласіпедаў растуць у сярэднім на 10—15 працэнтаў у год, але і арэндай карыстаюцца вельмі часта.Павел Нішчанка агучвае планы:
— Для патоку новых турыстаў да лета створым асаблівы камфорт. На маршруце з’явяцца спецыяльныя інфармацыйныя шчыты, паказальнікі, знакі. Гэта дапаможа іншаземцам арыентавацца ў горадзе, даведацца аб блізкасці гістарычных і культурных месцаў, кропак адпачынку і грамадскага харчавання. Навінка спатрэбіцца і для гасцей II Еўрапейскіх гульняў.
Да маштабнага спартыўнага спаборніцтва таксама развіваюць інфраструктуру на самых папулярных маршрутах, якія вядуць з Мінска за горад. Напрыклад, больш камфортна стане падарожнічаць у бок Бараўлянаў, Заслаўя, да Мінскага мора, вадасховішча Вяча. Да мая павінны завяршыць работы па рэканструкцыі пешаходна-веласіпеднай дарожкі на Пціч.
Максім Пучынскі, спецыяліст па развіцці інфраструктуры Мінскага веласіпеднага таварыства, расказаў пра бонусы, якія ў гэтым сезоне чакаюць гарадскіх жыхароў:
— Да 2020 года ў Мінску плануецца пабудаваць не менш за 5 велагаражоў у кожным раёне. У гэтым годзе толькі на аўтастаянках усталююць 20 такіх крытых стаянак. Кошт аднаго месца на іх вар’іруецца ад 3 да 7 рублёў за месяц арэнды.
Анкетаванне веласіпедыстаў паказала: 94 працэнты гатовыя за гэта плаціць. Таму попыт на велагаражы вялікі. Па гатовыя праекты для будаўніцтва звяртаюцца таварыствы ўласнікаў, ВНУ, уладальнікі ГЦ і бізнесмены.
І на дэсерт — самае цікавае. Упершыню ў нашай краіне запрацуе адзіная аўтаматызаваная сетка велапракату — нешта падобнае вы, напэўна, бачылі ў гарадах Заходняй Еўропы. Навінку пратэсціруюць ужо ў канцы красавіка, а ўлетку яна запрацуе на поўную моц.
— Звычайныя велапракаты працуюць так: прад’яўляем пашпарт, арандуем веласіпед, катаемся і вяртаем яго строга туды, дзе ўзялі. Мы ж стварылі мабільны дадатак, які дазваляе ўзяць двухколавы транспарт у адным пункце і пакінуць у іншым, — тлумачыць аўтар праекта «Хутка» Антон Сямашка. — Пагадзіцеся, так значна зручней!
Новая сістэма, якая зусім хутка запрацуе ў Гродне, дазволіць пазбегнуць папяровай валакіты і сур’ёзна павялічыць колькасць веласіпедыстаў. У аддзеле спорту і турызму Гродзенскага гарвыканкама пацвердзілі: такую ідэю яны ўсяляк падтрымліваюць, а навінку горад чакае ўжо ў гэтым сезоне. Праект стартуе з сямі кропак арэнды, ён паступова будзе пашырацца. Дарэчы, у найбліжэйшы час чакаецца запуск аўтаматызаванай сістэмы пракату веласіпедаў у Мінску, зараз ідзе пошук інвестараў.
