Давялося днямі зазірнуць у аддзел свежай садавіны супермаркета. Цытрусы ўжо нясмачныя — скончыўся сезон, а кошт на бананы не такі прыемны, як узімку. Ёсць вінаград, ківі і нават клубніцы, але ўсё быццам не тое… Яблыкі? Яблыкі! Ад 2,5 да 3,6 рубля за кіло. Цвёрдыя, сакавітыя. Але галоўнае — свае, беларускія. Бяром!
У наш час трэба адыходзіць ад стэрэатыпаў пра тое, што пірог з яблыкамі — дэсерт выключна восеньскі. Нарэшце мы не толькі поўнасцю забяспечваем сябе гэтым райскім фруктам, але і навучыліся захоўваць яго ў прамысловых аб’ёмах амаль да самага лета. Па звестках Міністэрства антыманапольнага рэгулявання і гандлю, запасы яблыкаў у стабфондах краіны на сёння налічваюць 171 % ад планавых лічбаў. Адным словам, можна гатаваць яблычныя пірагі хоць кожны дзень.
Для тых, каму надакучыла класічная шарлотка, ёсць годная альтэрнатыва — адкрытая галета. Прэснае пясочнае цеста і далікатнае кісла-салодкае яблычнае начынне. Гатуецца на раз-два, справяцца нават пачаткоўцы, асалода ад рэзультату гарантавана.
Вам спатрэбіцца:Сметанковае масла (лепш, калі будзе замарожанае) тром на тарцы. Прасейваем да яго пшанічную муку і дадаём соль. Пасля добра ўсё гэта расціраем рукамі ў крошку, каб не засталося буйных кавалачкаў масла. Дадаём 3–4 лыжкі халоднай вады і замешваем цеста. Павінна атрымацца тугая маса, якая не ліпне да рук, — адпраўляем яе адпачыць у халадзільнік хвілін на 10–15.
♦ сметанковае масла — 90 г
♦ мука — 170 г
♦ яблыкі — 3–4 шт.
♦ цукровая пудра
♦ дробка солі
Тым часам мыем яблыкі, а затым распалавіньваем іх і выдаляем асяродак з семкамі. Рэжам тонкімі слайсамі, але не аддзяляем іх адно ад аднаго — структуру палавінак захоўваем, каб яны эстэтычна ляглі на галету і не высахлі падчас запякання. Разабраўшыся з фруктамі, вяртаемся да цеста: раскатваем яго такой формы, каб яно ўмясцілася на вашу бляху. Я раблю гэта адразу на пергаменце для выпечкі, але можна і без яго — тады не забываем пра муку, каб цеста не ліпла да паверхні, дзе будзеце яго раскатваць. Таўшчыня асновы галеты ў 0,5 сантыметра будзе аптымальнай. Выкладваем на яе кавалкі яблыкаў шчыльна адно да аднаго, аднак слайсы павінны быць крыху пад нахілам. Трэба абавязкова падвярнуць краі цеста, каб сок, што пусцяць яблыкі, не выцек.
Адпраўляем выпякацца на 40 хвілін пры тэмпературы 180 градусаў. Яблыкі павінны стаць мяккімі, а акрайчыкі цеста — падрумяніцца. Перад падачай на стол пасыпаем галету цукровай пудрай.
kurak@sb.by
