У краіне працуе больш за 10 тэматычных падгруп, якія разглядаюць пытанні лібералізацыі бізнесуАмаль год таму МАРГ прынялося аналізаваць, што трэба памяняць, каб спрасціць жыццё гульцам галіны. Гэта дазволіла аператыўна адрэагаваць на даручэнне Прэзідэнта. Як вынік — у пачатку сакавіка ў Адміністрацыю Прэзідэнта быў накіраваны спіс амаль з чатырох дзясяткаў прапаноў, у тым ліку акумуляваць і ідэі ад бізнесу. Усе яны папярэдне былі адобраны.
— Нашы прапановы складаюцца з трох блокаў. Першы прадугледжвае ўнясенне змяненняў у заканадаўчыя акты для лібералізацыі работы прадпрыемстваў. Другі накіраваны на папярэджанне і выключэнне адміністрацыйных працэдур. Трэці блок — карэкціроўка заканадаўства аб кантрольна-нагляднай дзейнасці, — сцісла ўвяла ў курс справы начальнік галоўнага ўпраўлення арганізацыі гандлю і паслуг МАРГ Віялета Брэзоўская.
Яна спынілася на некаторых дэталях. У першым блоку, напрыклад, ёсць пункты аб спрашчэнні ўзгаднення рэжыму працы, адмене некаторых патрабаванняў для грамадскага харчавання і гандлю, парадку рэгулявання разлікаў гандлёвых сетак. Акрамя таго, сярод прапаноў — ідэі па падрыхтаваным МАРГ праекце ўказа аб спрашчэнні патрабаванняў да бізнесу ў малых гарадах. У прыватнасці, гаворка ідзе пра тое, каб дазволіць кафэ, дзе менш за 50 пасадачных месцаў, і магазiнам з плошчай да 100 «квадратаў» кардынальна знізіць падатковую нагрузку. Для ўсіх суб'ектаў будзе спрошчана сістэма рэгістрацыі: рэжым працы не прыйдзецца ўзгадняць з мясцовымі ўладамі, а прыступаць да справы можна будзе згодна з паведамляльным прынцыпам.
Читайте также
Зрэшты, пытанні для абмеркавання ўсё ж засталіся. Напрыклад, як быць з асартыментным пералікам, кантролем за яго захаваннем і нацэнкай на алкаголь у кафэ? Адказы МАРГ прапанавала шукаць, выкарыстаўшы наглядны свежы прыклад. Нагодай стала наведванне спецыялістамі кафэ на плошчы Перамогі ў Мінску. Гасцям прынеслі меню, дзе не было ніводнага беларускага моцнага напою, афіцыянт толькі развяла рукамі і параіла ўзяць што-небудзь з дарагога імпарту. Меню з айчынным алкаголем потым «знайшоў» адміністратар, патлумачыўшы, што прапанова не змяшчаецца ў галоўным меню. Дырэктар установы Андрэй Карачун на пасяджэнні рабочай падгрупы настойваў: у кафэ чатыры меню, прычым тое, што з беларускім алкаголем, 9 з 10 наведвальнікаў адразу адкідваюць, таму гасцям яго і не паказваюць.
Сустаршыня Рэспубліканскай канфедэрацыі прадпрымальніцтва Віктар Маргелаў бачыць сітуацыю інакш:
— Ёсць дзве стратэгіі працы — з абароту або з нацэнкі. Калі ёсць вялікія патокі, ёсць сэнс працаваць з абароту. Калі попыт падае, застаецца ўстойлівая група, якая зможа купіць і па высокіх цэнах.
Тым больш што дзяржава абмежавала надбаўку на айчынны алкаголь мацункам больш за 28 градусаў 60%.
— Я за рынкавыя механізмы, але тым не менш паняцце культуры прадпрымальніцтва нам трэба падымаць. Так што цалкам ад асартыментных пералікаў адмовіцца нельга, — лічыць дырэктар Дэпартамента па прадпрымальніцтве Мінэканомікі Пётр Арушаньянц.
У хуткім часе напрацоўкі рабочых падгруп лягуць у аснову змен Указа № 510 (аб удасканаленні кантрольнай дзейнасці) і Указа № 450 (аб ліцэнзаванні асобных відаў дзейнасці), а таксама ў Дэкрэт аб спрашчэнні вядзення бізнесу. Яго праект у бліжэйшы час павінны атрымаць на рукі ўсе ўдзельнікі працэсу, каб пераканацца: усе прапановы ўлічаныя. А 20 сакавіка павінен быць сфарміраваны чыставы варыянт, які будзе абмяркоўвацца ў Адміністрацыі Прэзідэнта.
