Правядзенне міні-кірмашоў вакансій стала амаль традыцыяй. Такім чынам прадпрыемствы, што адчуваюць рэальны недахоп персаналу, спрабуюць скараціць свой шлях да саіскальнікаў. А людзі, якія шукаюць працу, цвёрда ведаюць: тут заўсёды ёсць магчымасць знайсці сапраўды цікавую вакансію. Аддзел абслугоўвання грамадзян № 2, што размяшчаецца на праспекце Любімава, 14, прымае ўсіх жадаючых кожны тыдзень. Праўда, у апошнi час карцiна такая: патэнцыяльных працаўнікоў не вельмi шмат, а вось працадаўцы прапануюць даволi шырокi спектр рабочых месцаў. Якія прафесіі зараз найбольш запатрабаваныя і на які заробак можна арыентавацца, даведалася карэспандэнт «Р».
На маім гадзінніку 10.00. Двухгадзіннае мерапрыемства па пошуку працы пачнецца з хвіліны на хвіліну. Прадстаўнікі арганізацый ужо занялі свае месцы. Тут вайсковая часць 5448 рыхтуецца пачаць пошук новых супрацоўнікаў, з ёй суседнічае начальнік аддзела кадраў філіяла тралейбуснага парка № 4 ГП «Мінсктранс». Далей уладкаваліся ТАА «Персанал Эксперт» і ТАА «ПрафРэзервГруп», а паміж імі ўціснуліся мiнскiя яслі-сад № 329 і 16-я гарадская дзіцячая паліклініка.
Загадчыца ясляў-сада № 329 Лілія Быцанкова сёння настроена рашуча. Без новых супрацоўнікаў пакідаць кірмаш намеру яна не мае. Ёй патрэбны выхавальнікі, памочнікі выхавальнікаў, кухонныя работнікі харчовага блока. Таксама хацелася б знайсці повара. Але з гэтым можна яшчэ пачакаць. У сярэднім выхавальнікі зарабляюць 450—500 рублёў, памочнікі – 350—400 рублёў. Заробак хоць і не такi вялікі, але загадчыца апелюе педагагічнымі надбаўкамі. З цікавасцю разглядае лісток з пералікам вакансій 16-й гарадской дзіцячай паліклінікі былая настаўніца пачатковых класаў.
— Я б пайшла медрэгістратарам. Знаёмая так працуе. Кажа, вельмі добра. Але ж гэтая паліклініка знаходзiцца на вулiцы Адоеўскага. Далекавата ад мяне, — расчароўваецца жанчына.
Да слова, на стаўцы медрэгістратар атрымае там 300 рублёў, а за 1,5 стаўкі – 400 рублёў. Паліклініка таксама шукае дворніка і санітарку фізіятэрапеўтычнага кабінета. Працоўны дзень у гэтых спецыялiстаў з 7.00 да 15.30.
На 1 жніўня ў Мінску налічвалася 18 961 вакансія, на якія прэтэндуюць усяго 943 беспрацоўныя.
Па статыстыцы, на 1 жніўня ў Мiнску налічвалася 18 961 свабодная вакансія, на якiя прэтэндуюць усяго 943 беспрацоўныя. Узровень беспрацоўя адзiн з самых нiзкiх за апошнiя гады — 0,1 працэнта ад колькасці эканамічна актыўнага насельніцтва. Так што можна сказаць, што часцей за ўсё не работнiк шукае працу, а праца шукае работнiка.
КАМПЕТЭНТНА
Таццяна КУДЗЕВIЧ, намеснік старшыні камітэта па працы, занятасці і сацыяльнай абароне Мінгарвыканкама:
— У студзені—ліпені гэтага года намi праведзена 111 мерапрыемстваў па працаўладкаваннi насельнiцтва, з іх 80 міні-кірмашоў вакансій, 11 Дзён прадпрыемства, 15 рабочых сустрэч, метадычны семінар, агульнагарадскі кірмаш вакансій і тры электронныя кірмашы вакансій. У мерапрыемствах прынялі ўдзел каля 300 арганізацый горада. Наведалі iх больш за 7000 чалавек.
Кансультацыі па пытаннях працаўладкавання і актыўных мерах садзейнічання занятасці насельніцтва атрымалі больш за 3,4 тысячы чалавек, з якіх больш за 1000 прайшлі папярэдняе навучанне для далейшага працаўладкавання.