Выстава-конкурс пад такой назвай адкрылася ўчора ў Нацыянальным цэнтры мастацкай творчасці дзяцей і моладзі.
ВЕРНІСАЖ У Мінску — гэта фінальны этап рэспубліканскага спаборніцтва для юных мастакоў з усёй краіны, паведаміла карэспандэнту «БН» метадыст аддзела выяўленчай, дэкаратыўна-прыкладной творчасці і выставачнай работы цэнтра Святлана СКВАРНЮК.
— Гэты конкурс традыцыйны для нас: ладзіцца ўжо пятнаццаты год запар, — кажа Святлана Скварнюк. — У фінал выйшла болей за шэсць соцен індывідуальных і калектыўных творчых работ. Іх ужо ацаніла прафесійнае журы, вызначылася з пераможцамі. Аднак дыпломы і прызы юныя мастакі атрымаюць толькі 29 студзеня, калі вернісаж будзе закрывацца.
Такім чынам, на выставе-конкурсе можна ўбачыць дзіцячыя работы, выкананыя ў зусім розных тэхніках дэкаратыўна-прыкладной творчасці. Гэта кераміка, вышыўка, ткацтва, габелен, выцінанка, маляванка, роспіс па дрэве, тканіне... Тэматыка традыцыйная для гэтых перадсвяточных дзён — зіма, Каляды, навагоднія цуды.
Таццяна УСКОВА, «БН»
