Магілёўскія курсанты правялі дабрачынную акцыю «Падары ўсмешку дзецям».
— Курсанты Магілёўскага вышэйшага каледжа МУС і навучэнцы медыцынскага каледжа падрыхтавалі цікавую праграму, за ўласныя грошы закупілі цацкі, прысмакі, канцтавары, — расказала старшы інспектар групы інфармацыі і грамадскіх сувязяў Магілёўскага вышэйшага каледжа МУС Наталля Гоманава.
Дзеці, якія праходзяць курс лячэння ў Цэнтры медыцынскай рэабілітацыі дзяцей-інвалідаў Магілёўскай абласной дзіцячай бальніцы, гасцям былі вельмі рады. Яны ахвотна ўдзельнічалі ў гульнях і апладзіравалі самадзейным артыстам, сярод якіх былі і вучні Буйнічскай сярэдняй школы Магілёўскага раёна.
— Такія сустрэчы сталі добрай традыцыяй, — адзначыла спецыяліст. — Гледзячы, як маленькія пацыенты ўсміхаюцца, хочацца верыць, што падораная ім радасць унясе сваю лепту ў барацьбу з хваробай.
На здымку: маленькія пацыенты былі рады падоранаму святу.
Фото: БЕЛТА
