Дарогу дадому без дапамогi ратавальнiкаў знаходзяць не ўсе аматары цiхага палявання.Знайдзi мяне
Грыбны сезон у разгары. Аматары цiхага палявання навыперадкi спяшаюцца з кошыкамi ў лес. Дарогу назад без дапамогi ратавальнiкаў знаходзяць не ўсе. У сярэднiм у лясах губляецца 350—400 чалавек у год. Часцей за ўсё гэта пажылыя людзi i дзецi.У Вiцебскай вобласцi, напрыклад, толькi за адны суткi ратавальнiкi знайшлi пяць чалавек, якiя заблудзiлiся ў лесе. У Вiцебскiм абласным упраўленнi МНС удакладнiлi, што дапамога ратавальнiкаў спатрэбiлася пенсiянерам, мужу з жонкай, ля вёскi Евiна Гарадоцкага раёна, пенсiянерцы i яе дачцэ ля вёскi Руда Бешанковiцкага раёна i яшчэ адной пенсiянерцы ля вёскi Гендзiкi Полацкага раёна. Ва ўсiх выпадках людзi адправiлiся ў лес для збору грыбоў i ягад, аднак дарогу дадому самастойна знайсцi не змаглi. Для пошукавых работ задзейнiчалi ратавальнiкаў i супрацоўнiкаў мiлiцыi. Аматары цiхага палявання былi знойдзены работнiкамi МНС, у медыцынскай дапамозе не мелi патрэбу.
Дарэчы, пошукава-выратавальная служба МНС была створана ў 2018 годзе — з тых часоў ратавальнiкi разам з валанцёрамi, работнiкамi мiлiцыi i лясной гаспадаркi ўжо знайшлi сотнi чалавек. У 2018 годзе — 279 чалавек (з iх 31 дзiця), у мiнулым — 425 дарослых i 26 дзяцей, а за шэсць месяцаў гэтага года — 64 чалавекi, у тым лiку 8 дзяцей.
Стаяць, не рухацца
Як пайсцi ў лес i вярнуцца дадому да пачатку любiмага серыяла? Самае галоўнае — не спадзявайцеся на «пранясе». Губляюцца ўсе — ад малога да вялiкага, i няма нiводнай прычыны, чаму менавiта вы павiнны стаць шчаслiвым выключэннем з правiлаў. У МНС упэўнены: вас не выратуе тое, што прадзед быў заўзятым грыбнiком i вы на ўзроўнi ДНК лёгка знойдзеце дарогу.
Аматары цiхага палявання навыперадкi спяшаюцца з кошыкамi ў лес. Старанна падрыхтуйцеся да вылазкi. Абавязкова папярэдзьце сваякоў цi суседзяў пра прыблiзны маршрут i час вяртання. Калi вы не збiраецеся партызанiць — хавайце далей бацькоўскi камуфляж, бо, злiўшыся з лiстотай, станеце незаўважным не толькi для цешчы, але i для ратавальнiкаў.
Адзенне павiнна быць шчыльнае i яркае. У iдэале патрэбна чырвоная кепка. Захапiце з сабой нож, запалкi, лекi i ваду. У спiсе неабходных атрыбутаў любога грыбнiка павiнен быць компас. Калi ваш дыягназ «тапаграфiчны крэцiнiзм», то наступная парада вам дакладна спатрэбiцца. Цалкам зарадзiце тэлефон i ўстанавiце дадатак «навiгатар» — пажадана, каб ён працаваў нават без iнтэрнэту. У лясным гушчары ён можа стаць вашым збавiцелем.
Дапусцiм, вы няўважлiва прачыталi папярэднi абзац i ўсё-такi згубiлiся. Афiцыйны прадстаўнiк МНС Вiталь Навiцкi параiў арыентавацца на лiнii электраперадачы, прасекi i сцяжынкi:
— Выявiўшы адзiн з гэтых аб’ектаў, прытрымлiвайцеся яго — i вы абавязкова выйдзеце да людзей. Ручай цi рэчка таксама выдатныя арыенцiры. Смела рухайцеся ўнiз па цячэннi, яно заўсёды прывядзе да людзей. Пакiдайце за сабой сляды: ламайце галiнкi, вешайце стужачкi — так вас лягчэй будзе знайсцi. Можна ўзяць свiсток.
Самае галоўнае — не панiкаваць! Спынiцеся, выдыхнiце i прыслухайцеся. Трактар, напрыклад, чуваць за 4 кiламетры, сабачы брэх — за 3, а цягнiк — за 10. Павольна i ўпэўнена рухайцеся да мэты.
Што тычыцца надвор’я, то яно на баку грыбнiкоў. Па дадзеных на ранiцу пятнiцы, толькi ў шасцi раёнах краiны працягвае дзейнiчаць забарона на наведванне лясоў (Мiнская i Гомельская вобласцi).
gorbatenko@sb.by
