Прыемнымі падарункамі парадуе Вялікі тэатр аматараў класічнай музыкі напярэдадні навагодніх свят. У аўторак 15 снежня сольны канцэрт на сцэне малой залы дасць народны артыст Уладзімір Громаў. Спявак выканае вакальныя цыклы Густава Малера, Ральфа Воана-Уільямса, а таксама фрагменты з паэмы «Отчалившая Русь» Георгія Свірыдава, творы Франца Шуберта і Сяргея Рахманінава.
— Да камерных вакальных праграм я дакрануўся раней, чым выйшаў на вялікую сцэну роднага тэатра ў спектаклях. 15 снежня публіка пачуе тую музыку, якой мне хочацца падзяліцца не з абавязку службы, а па закліку сэрца... Так, гэтыя вакальныя цыклы я ўжо спяваў раней. Але, пагадзіцеся, калі мы перачытваем кнігу, кожны раз адкрываем яе для сябе нанова. Так і гэтыя творы, якія не вельмі часта гучаць у нашым тэатры, ды і ў нашай краіне ў цэлым: яны пастаянна жывуць у маёй галаве, душы, сэрцы, і ў розныя гады я знаходжу ў гэтых творах нешта новае, чым абавязкова хочацца падзяліцца з публікай, падарыць ёй сваё прачытанне і бачанне.
А ў пятніцу, 18 снежня, на той жа сцэне Вялікага тэатра з сольным канцэртам выступіць народная артыстка Ніна Шарубіна, якая падрыхтавала для слухачоў унікальную праграму.
Дарэчы, праспяваць любы сольны канцэрт, адзначае артыстка, нашмат складаней, чым спектакль:
— Асабліва ў Камернай зале, дзе ты адзін на адзін са слухачом і быццам аголены, таму што схавацца няма дзе — ні за аркестрам, ні за дэкарацыямі, ні за калегамі. Таму запрашаю любімых гледачоў на сустрэчу, будзем размаўляць душамі.
mila@sb.by
Фота прадстаўлена Вялікім тэатрам