Каб кожны куток быў прыгожым
Сяргей Пыраеў — старшы майстар па капрамонце будынкаў КУП «Добрушскі камунальнік», яго жонка Анжэла — дырэктар прадпрыемства «Архітэктура Добруша». Гэтымі днямі сям’я вярнулася з падарожжа. «Засумавалі па горадзе, па хаце — у любым вандраванні ўсё роўна імкнёмся на радзіму», — кажа Сяргей і запрашае на ўтульную кухню піць духмяную гарбату з ягад. У цэнтры стала — апетытны торт, вакол — вытанчаныя бірузовыя кубкі з ручным роспісам. Дарэчы, вытворчасці Добрушскага фарфоравага завода.Анжэла кажа, што ў іх сям’і ўсе патрыёты: «Калі можна купіць сваё, то так і робім!» Іх старэйшая дачка Віялета выпырхнула з-пад бацькоўскага крыла, скончыла тэхнічны ўніверсітэт у Гомелі, там жа засталася жыць. Малодшая Насця ў школьных клопатах — дзяўчынка перайшла ў дзявяты клас, праз год збіраецца паступаць у ліцэй і затым асвойваць прафесію фармацэўта.
— Добра, калі кожны мае магчымасць выбраць свой шлях, — упэўнены Сяргей. — Я вызначаўся з прафесіяй лёгка — маці і тата былі будаўнікамі, таму важнасць гэтай працы ўсвядоміў яшчэ ў дзяцінстве, калі бегаў да іх на работу, каб дапамагчы. Мой стаж у сферы — амаль 30 гадоў, апошнія 15 — у «Добрушскім камунальніку». Я і зараз, верыце, шчыра ўлюбёны ў сваю працу — асабліва радуюся, калі чую добрыя водгукі ад людзей. З таго часу як стала вядома, што ў Добрушы пройдзе Дзень беларускага пісьменства, мы ўсе актыўна ўключыліся ў падрыхтоўку да гэтай грандыёзнай для нашага раёна падзеі. Вы ж ехалі, бачылі, якім прыгожым стаў наш горад. Думаю, кожны населены пункт Беларусі павінен развівацца і станавіцца прыгажэйшым. Так кажа і наш Прэзідэнт. Зразумела, для такіх змяненняў патрэбны сродкі, але палітыка дзяржавы якраз накіравана на тое, каб стварыць камфортныя ўмовы для жыцця не толькі ў вялікіх гарадах, але і ў кожнай вёсцы ці пасёлку.
Гаспадары запрасілі нас на невялікую экскурсію па Добрушы. Новы асфальт бялее свежымі разметкамі, святочна выглядаюць пафарбаваныя ў новыя колеры будынкі прадпрыемстваў. Упрыгожылася сэрца горада — цэнтральная плошча.
— Будаўнікі і ўсе тыя, хто мае дачыненне да капітальнага рамонту і рэканструкцыі горада, вельмі пастараліся. Работы былі праведзены проста каласальныя, на дзесяцігоддзі наперад. У такі абноўлены горад вельмі хочацца запрашаць гасцей!
Імпульс з працягам
Дарэчы, сродкі на гэтыя мэты былі ўкладзены велізарныя — амаль 30 мільёнаў рублёў, большую частку выдзеліў рэспубліканскі бюджэт.— Грошы накіравалі на добраўпарадкаванне і рэканструкцыю цэнтральных вуліц і плошчы, сквера па праспекце Міру, мадэрнізацыю і замену інжынерных сетак, рамонт амаль чатырох дзясяткаў шматпавярховак, — падзяліўся вынікамі падрыхтоўкі горада да свята старшыня Добрушскага райвыканкама Аляксандр Матарас. — Завершана будаўніцтва шматфункцыянальнай спартыўна-гульнявой пляцоўкі, новы выгляд атрымала пешаходная зона ў цэнтры горада. Замест асфальту зараз яна выкладзена пліткай з беларускім арнаментам, які сімвалізуе сям’ю.
У ліпені пасля рэканструкцыі адкрыўся стадыён «Юнацтва»: зараз там сучаснае футбольнае поле са штучным пакрыццём, новая трыбуна на 198 месцаў, пяць бегавых дарожак, універсальная пляцоўка для гульні ў валейбол, баскетбол, хакейная каробка. Падчас святкавання Дня беларускага пісьменства там пройдзе фестываль футбола памяці знакамітага ўраджэнца Добруша першага міністра спорту і турызму Беларусі Уладзіміра Рыжанкова, кажа старшыня Добрушскага райвыканкама:
— Я спадзяюся, што дабрушане не толькі будуць падтрымліваць парадак і прыгажосць у горадзе, але і самі працягнуць добраўпарадкоўваць тэрыторыі побач са сваімі дамамі і працоўнымі месцамі. Такі імпульс павінен мець развіццё — я ў гэтым упэўнены!
Дзякуй за дарогі
Пакуль мы разглядалі новы Добруш, паспелі пагутарыць з мясцовымі жыхарамі. У якасці невялікага аўтарскага адступлення хочацца сказаць, што людзі сапраўды выглядалі натхнёна і з задавальненнем дзяліліся эмоцыямі наконт пераўвасаблення горада. Анастасія Асадчая, маці двух дачок, зараз чакае нараджэння трэцяга дзіцяці, падзялілася ўражаннямі:— Цэнтр стаў іншым — сучасным, прыгожым, дзіцячая пляцоўка фантастычная. А колькі кветак пасадзілі! І яшчэ адзін момант: я вадзіцель, таму вельмі хачу ад усіх, хто за рулём, падзякаваць за новыя дарогі! Так, у горадзе яшчэ засталіся ўчасткі, якія патрабуюць рамонту. Будзем спадзявацца, што і да іх дойдзе чарга. Напрыклад, чакаем, што гэтак жа, як у цэнтры, з часам будзе ў раёне Меліяратар.
Адкрыццё помніка
Сталіцай Дня беларускага пісьменства выбіраецца горад, які пакінуў заўважны след у гісторыі краіны як цэнтр кнігадрукавання і літаратуры, асветы і культуры. Першае свята адбылося ў Полацку ў 1994 годзе. Сталіцай XXIX Дня беларускага пісьменства абрана радзіма Івана Шамякіна, які нарадзіўся ў вёсцы Карма Добрушскага раёна. Дарэчы, адкрыццё помніка знакамітаму беларускаму пісьменніку стане цэнтральнай падзеяй свята.У канцэпцыю Дня беларускага пісьменства закладзены асноўныя тэмы — Год гістарычнай памяці, гісторыка-культурная і духоўная спадчына раёна, юбілеі класікаў беларускай літаратуры Янкі Купалы, Якуба Коласа і Максіма Багдановіча.
Літаратурныя дажынкі
Першым пунктам святочнага сцэнарыя стане ўскладанне вянкоў і кветак да брацкай магілы салдат Чырвонай арміі, якія склалі свае галовы пры вызваленні Добруша ад нямецка-фашысцкіх захопнікаў. Дарэчы, адначасова такія мітынгі пройдуць на ўсіх месцах масавых пахаванняў, якія знаходзяцца на тэрыторыі раёна, — іх тут больш як сорак. Далей побач з мемарыялам «Памяць» адбудзецца рэканструкцыя «Баі за Добруш 1943 года. Партызанскае супраціўленне», якую рыхтуе ваенна-гістарычнае клубнае аб’яднанне «Гонар мундзіра» пры падтрымцы Міністэрства адукацыі.У цэнтральнай частцы горада будуць арганізаваны дзясяткі гістарычных, літаратурных, творчых, спартыўных лакацый, гульнявыя зоны для дзяцей, рамесныя рады, пройдзе выстава рэгіянальных сродкаў масавай інфармацыі.
Таксама ў праграме — гашэнне арыгінальнай маркі, прысвечанай Дню беларускага пісьменства, «Славянскія літаратурныя дажынкі», цырымонія ўзнагароджання пераможцаў Нацыянальнай літаратурнай прэміі. Сёлета на конкурс было пададзена 68 твораў у сямі намінацыях.
Трэба шанаваць спадчыну
Да ўдзелу ў свяце рыхтуюцца і ўсе навучальныя ўстановы Добрушскага раёна. Валянціна Сідарцова амаль 40 гадоў выкладае беларускую мову і літаратуру ў пятай сярэдняй школе горада, 26 з іх была дырэктарам установы:— Шанаваць сваю мову, нашу духоўную спадчыну — гэта мець карані з гісторыяй краіны, народам і сваёй сям’ёй. Крылы, якія мы можам даць дзецям, гэта не толькі аб матэрыяльным — у першую чаргу мы павінны забяспечыць ім духоўны падмурак, каб увесь час яны адчувалі сябе часткай вялікай гісторыі непераможнага народа. І такія святы — якраз дэманстрацыя непарыўнай сувязі пакаленняў, напамін, які годны шлях прайшлі беларусы, каб сёння мы маглі жыць у вольнай, незалежнай і прыгожай краіне.
severyanova@sb.by
Фота БЕЛТА