З 17-га на 18 мая мінчанам прапануюць трапіць у СССР і навучыцца танцаваць вальс.
Ва ўсім свеце пройдзе акцыя «Ноч музеяў». У час яе, напрыклад, наведвальнікі Музея гісторыі Мінска «перанясуцца» ў 1940—1980-я гады. Для іх падрыхтавана экспазіцыя «Back in USSR/Зноў у СССР». Тут жа гасцей пачастуюць чорным, зялёным, белым, жоўтым і травяным чаем.
Тых, хто завітае ў Нацыянальны гістарычны музей, з 19.00 да 2.00 чакае сустрэча з мімамі і артыстамі на хадулях. Тут падрыхтавалі шоу мыльных бурбалак.
У Доме-музеі І з’езда РСДРП з 19.00 да 22.00 пакажуць анімацыйныя казкі ГДР, створаныя кінакампаніяй «DEFA». У гэты ж час у музеі прэзентуюць выставу «OSTальгія», прысвечаную сяброўству паміж жыхарамі ГДР і СССР.
Падтрымаюць акцыю «Ноч музеяў» і ў абласных цэнтрах. У Гомельскім палацава-паркавым ансамблі можна будзе пасядзець у французскім кафэ, зазірнуць у італьянскі дворык, паслухаць джаз.
У Брэсцкім абласным краязнаўчым музеі пройдуць рыцарскія турніры, а ў Магілёўскім абласным краязнаўчым музеі імя Раманава навучаць рабіць керамічныя цацкі-свістулькі.
Дарэчы, на наступны дзень — 18 мая ўсе музеі краіны будуць працаваць бясплатна.
