Вайна ў Сірыі працягваецца шосты год і закранае ўсё больш краін і інтарэсаў. Многія ўжо загаварылі пра верагоднасць трэцяй сусветнай вайны. Але мала хто задумваецца, у што геапалітычныя амбіцыі розных сіл ператварылі яшчэ 6 гадоў таму квітнеючую дзяржаву, аб’ём ВУП якой Міжнародны валютны фонд ацэньваў у 59,6 мільярда долараў, а ўзровень інфляцыі ўсяго ў 2 працэнты. Сірыя лічылася адной з самых прыгожых краін на Блізкім Усходзе з вялікай колькасцю помнікаў архітэктуры, гісторыя якіх налічвае тысячы гадоў.
Сёння гэтага няма. Затое ёсць каля 400 тысяч забітых і мільёны бежанцаў. І канца гэтай бойні яшчэ не відаць. Некаторыя эксперты мяркуюць, што з геаграфічнага і экалагічнага пунктаў гледжання сірыйскі канфлікт абумоўлены вострым крызісам у водазабеспячэнні. І каб вырашыць праблемы гэтай краіны, неабходна везці туды не танкі і самалёты, а апрасняльнікі марской вады. Але калі ў адзіны клубок завязваецца мноства глабальных інтарэсаў, адной вадой гэты пажар не патушыць.
Сумная іронія лёсу. Нягледзячы на тое што самастойнай Сірыя стала ўсяго каля 70 гадоў таму, цывілізацыя на яе тэрыторыі зарадзілася яшчэ ў IV тысячагоддзі да нашай эры. Больш за тое, Сірыю часта называлі калыскай хрысціянства. Апостал Павел быў родам з Сірыі — з горада Тарса, які цяпер належыць Турцыі. Сёння ж Сірыя ператварылася ў руіны. Некалі багатая і квітнеючая краіна практычна сцёртая з твару зямлі. І маштабы гэтай страты чалавецтву яшчэ толькі трэба будзе асэнсаваць.
osipov@sb.by
