Гадзiннiк, нягледзячы на стагоддзi, iдзе, нiбыта быў зроблены ўчора
Дырэктар музея Святлана Тамчук лічыць, што хранометр варты такой увагі:
— Да нас гадзіннік трапіў з музея Каўнаса ў 1958 годзе з кароткай суправаджальнай інфармацыяй. Быў такі час, калі музеі абменьваліся экспанатамі. Але гісторыя стварэння гадзінніка, на жаль, да канца невядомая. На цыферблаце выгравіраваны надпіс «Brzesc 1767». Значыць, заказчык быў з нашага горада. Зверху, хутчэй за ўсё, імя майстра — Ёган Готфрыд Шміт. Мабыць, ён з Германii. Чаму тады «гадзіннік кахання»? Так яго назвалі наведвальнікі. Справа ў тым, што фрагмент упрыгажэння гадзінніка — сэрца, прабітае стралой Амура. Мы мяркуем, што заказчык падарыў масіўны хранометр сваёй каханай.
Узрост для механiзма не перашкода. У свой юбілей гадзіннік здолеў прайграць мелодыю. Але рабіць гэта кожны дзень ён не можа. Патрэбна рэканструкцыя. Бо быў ён напольным, з корпусам і маятнiкам, а гэтыя элементы страчаны.
«Любоўныя зёлкi». Рэцэпт не страчаны. Такая ж гарбата прадавалася калiсьцi ў Брэст-Лiтоўску
Яшчэ ў музеі (у якім налічваецца каля 4 тысяч прадметаў асноўнага фонду) у «дзень нараджэння» хранометра з'явіўся новы арт-аб'ект — «Дрэва кахання». Яго ролю з гэтага дня будзе выконваць воцатнае дрэва — сумах, што расце ў двары музея. А вядомыя рэканструктары Андрэй і Алена Варабей на час сталі тымі самымі закаханымі, памяць пра якіх захаваў стары гадзіннік. Каля «Дрэва кахання» яны, апранутыя ў старадаўнія касцюмы, далі клятву адзін аднаму ў вернасці. А потым пачаставалі гасцей гарбатай — «Любоўнымі зёлкамі», менавiта такая ў свой час прадавалася ў Брэст-Літоўску. І, зразумела ж, яблыкамі. Якое ж каханне без спа-кусы?
У «закаханага» дрэва зараз змогуць загадаць жаданне як жыхары горада, так і турысты. Тым больш што расце яно на адной з аўтэнтычных вулачак старога горада.
Хоць да Дня святога Валянціна яшчэ доўга і, здавалася б, музейнае свята не ў тэму, але атрымалася яно вясёлым і светлым. Пра каханне патрэбна казаць кожны дзень, лічыць Святлана Тамчук. Яна ўпэўнена, што мерапрыемствы з элементамі анімацыі прыцягнуць наведвальнікаў:
— У гэтым годзе ў нас пабывала каля 10 тысяч чалавек. Каб гасцей стала яшчэ больш, маем намер рабіць падобныя святы ў гонар нашых лепшых экспанатаў.
valentinak3@mail.ru