
Холад родных сцен
— У цэнтры ўвагi ратавальнiкаў круглы год знаходзяцца адзiнокiя пенсiянеры, асаблiва тыя, хто валодае дрэннымi звычкамi, iнвалiды, а таксама сем’i, дзе гадуецца шмат дзяцей або прызнана, што тыя знаходзяцца ў сацыяльна небяспечным становiшчы, — заўважае Кацярына Гаўрык, старшы iнспектар сектара прапаганды i ўзаемадзеяння з грамадскасцю Маскоўскага РАНС Мiнскага гарадскога ўпраўлення МНС.Прыватны дом схаваўся за шматкватэрнымi новабудоўлямi на вулiцы Хмялеўскага. Паводле iнфармацыi, якая маецца ў тэрытарыяльным цэнтры сацыяльнага абслугоўвання насельнiцтва Маскоўскага раёна Мiнска, у адной з трох яго кватэр жыве адзiнокi iнвалiд II групы. Тамара Пяткевiч, загадчык аддзялення першаснага прыёму, аналiзу, iнфармавання i прагназавання цэнтра, папярэджвае: лёгка не будзе! Дзядуля надзвычай не любiць вiзiцёраў i сацыяльных работнiкаў да сябе не пускае. Мiж тым iнспектары МНС падазраюць, што печ у гэтым доме знаходзiцца ў нездавальняючым стане i можа стаць прычынай бяды.
Прадказаннi спраўджваюцца: Аляксандр Валер’евiч крыху прачыняе дзверы толькi для таго, каб пасварыцца з намі. Угаворы i прапановы дапамогi на яго не дзейнiчаюць, даводзiцца адступiць, так i не ўбачыўшы печ.
Нялёгкiм аказалася i наведванне 81-гадовай Янiны Канстанцiнаўны. Адзiнокая пажылая жанчына займае палову вельмi прыстойнага дома на вулiцы Курганнай.

…Бясконцыя скрыначкi, мяшочкi, вузлы з адзеннем, посуд, невядомыя прылады незразумела для чаго пакрываюць нефарбаваны пол. Гаспадыня ляжыць на канапе, накрыўшыся коўдрамi i палiто — у доме холадна. Неатынкаваная i непафарбаваная печ, каля якой складзены дровы, не тапiлася ўжо колькi дзён. Затое побач з гаспадыняй — абагравальнiк, электрычная плiтка i чайнiк. Юрый Богдан, iнспектар iнспекцыi нагляду i прафiлактыкi Маскоўскага РАНС Мiнскага гарадскога ўпраўлення МНС, адразу ж пачынае даследаваць iх корпус i правады на прадмет пажарнай бяспекi.
— Як грэюся? Ды вось, то абагравальнiк уключу, то плiтку, а яшчэ бутэлькамi, — з коўдравых нетраў гаспадыня дастае пластыкавую бутэльку з гарачай вадой.
Здавалася б, бабуля будзе рада любой дапамозе. Аднак усе ўгаворы згадзiцца на наведванне сацыяльным работнiкам цi хоць дазволiць нам прыгатаваць ёй гарбату разбiваюцца, як хвалi аб бетонны мол.
— Мне нiчога не трэба! Не хачу! — паўтарае яна. — Я сябе самастойна абслугоўваю, не маю патрэбы нi ў чыiх паслугах! Калi што, суседку вунь папрашу дапамагчы.
Аўтаномнага пажарнага абвяшчальнiка таксама няма, хаця грошы на яго выдзялялiся. Справа ў тым, што Янiна Канстанцiнаўна не з’яўляецца ўласнiкам гэтага жылля, таму i сама ў iм нiчым не займаецца, i другiя не маюць на гэта права.
Зона павышанай увагі
Пакiдаем гаспадыню, узяўшы з яе абяцанне абавязкова патэлефанаваць у цэнтр сацыяльнага абслугоўвання цi ў Маскоўскi РАНС, калi яна ўсё ж перадумае наконт дапамогi. Папрасiлi таксама трымаць абагравальнiк далей ад гаручых матэрыялаў.— Гэта завадскi абагравальнiк, а не самаробны, але ён сам па сабе не вельмi бяспечны, — тлумачыць Юрый Богдан. — Гаручыя матэрыялы, напрыклад фiранку, лепш трымаць ад яго на адлегласцi не менш за 70 сантыметраў. Спiраль гэтага iнфрачырвонага абагравальнiка награваецца дастаткова моцна, да таго ж яна параўнальна адкрытая. Таму наогул не пакiдайце без нагляду абагравальнiкi i iншыя электрычныя прыборы.

Гэта ў нейкiм сэнсе дасягненне: кажуць, яшчэ нядаўна Янiна Канстанцiнаўна выкарыстоўвала ўвогуле самаробную прыладу, але па просьбах ратавальнiкаў усё ж замянiла яе.
— Артыкул 23.46 КаАП прадугледжвае адказнасць за парушэнне правiлаў пажарнай бяспекi. Штраф можа дасягаць 30 базавых велiчынь, — працягвае Юрый Богдан. — Але адзiнокiх пажылых людзей мы стараемся ўгаворваць, а не караць, дапамагаем iм.
Абвяшчальнiк — галасiсты сябар
Якраз насупраць жыве яшчэ адзiн пенсiянер, iнвалiд III групы. Праўда, адзiнокiм яго не назавеш: Iвана Пятровiча часта наведваюць дзецi i ўнукi. Печ у яго доме замянiў газавы кацёл, якi прадбачлiва забяспечаны газавым аналiзатарам. Маецца i аўтаномны пажарны абвяшчальнiк, прычым у рабочым стане.— Працуе ён, працуе! — запэўнівае гаспадар. — I батарэйку нядаўна мяняў. Ён мяне неяк выручыў — я патэльню на плiце забыўся.
Пасля кароткай прафiлактычнай размовы i ўручэння тэматычных буклетаў гаспадар праводзiць нас на вулiцу. Прыемна, калi людзi зацiкаўлены ва ўласнай бяспецы.
У адной з кватэр па праспекце Незалежнасцi жывуць мацi i двое дарослых дзяцей. Старэйшая дачка з’яўляецца iнвалiдам II групы. Плiта не працуе, гаспадары карыстаюцца электрычнай плiткай, проста на стале цыгарэтны попел i запалкi, парваныя шпалеры вiсяць лахманамi: правiлы пажарнай бяспекi тут яўна не выконваюцца. Сям’i будзе аказана адрасная матэрыяльная дапамога для навядзення парадку, i, зразумела, кватэра пакуль застанецца на кантролi супрацоўнiкаў МНС.

ДАРЭЧЫ
У 2020 годзе ў краiне адбылося 6085 пажараў. Прычынай 1319 з iх стала парушэнне правiл устаноўкi i эксплуатацыi печаў, цеплагенерыруючых агрэгатаў i прылад. У Мiнску такiх пажараў было шэсць
nevmer@sb.by