Цячэ вада ў ярок

Ратавальнiкi: нечаканая паводка закранула па краiне 4 населеныя пункты, 4 участкі дарог і 3 масты

Пакуль з ЗША і краін Еўрапейскага саюза прыходзяць навіны пра анамальныя халады, у нас з-за высокіх для гэтай пары года тэмператур пачаліся паводкі. Першай «паплыла» Гомельшчына. Там затапленні фіксуюцца адразу ў чатырох раёнах: Петрыкаўскім, Жыткавіцкім, Добрушскім і Рагачоўскім. Затым падтапленні пачаліся ў Магілёўскай, Віцебскай і Мінскай абласцях. Падтопленымі аказаліся 4 населеныя пункты, 4 участкі дарог і 3 масты. Месцамі сітуацыя настолькі сур’ёзная, што нават без лодак не абысціся. На дапамогу мясцовым жыхарам выехалі ратавальнікі. Яны патрулююць размытыя дарогі.

Ратавальнікі пільна сочаць за сітуацыяй з падтапленнямi
Фота прэс-службы МНС

Гомельшчына — традыцыйна самы паводканебяспечны рэгіён.  Тут рэкі Прыпяць, Днепр, Бярэзіна, Сож набіраюць сiлу і шырыню. Але сюрпрызы падносяць і меншыя вадаёмы. Воды ракi Случ у Жыткавіцкім раёне праніклі на 6 падворкаў вёскі Ленін, у Рагачове мясцовая Друць падтапіла 8 двароў. Станоўчая дынаміка росту ўзроўню вады ў рэгіёне ва ўсіх рэках. З берагоў ужо выйшлі Днепр, Бярэзіна, Прыпяць. Недалёка ад Петрыкава пад вадой апынуўся цэлы ўчастак дарогі. Машыны вымушаны рушыць у аб’езд.  Петрыкаўшчына заўсёды ў зоне рызыкі. Напрыклад, вёска Снядзін кожную вясну ператвараецца ў востраў. Сюды на лодках дастаўляюць людзей, прадукты і лекі. Мясцовы жыхар старшыня Галубіцкага сельсавета Уладзімір Аляксандраў зімовыя праблемы ацэньвае як рэпетыцыю вялікай паводкі:

— Пакуль нават у плюс, што Прыпяць без лёду — у нас паром ходзіць. Але калі сур’ёзна, сітуацыя, на мой погляд, такая ж, як у 2013 годзе, калі мы ўсе тут «танулі». Вада ўжо на тых рызыковых узроўнях.  Калі прырода дадасць дажджу і снегу, да вясны «паплывём». 

У 2013-м цёплая зіма і багатыя ападкі прывялі да моцнай паводкі ў басейне Прыпяці.  «Буянiлi» ўсе мясцовыя рэкі. Ратавальнікі гатовы прыйсці на дапамогу ў любую хвіліну, удакладняе афіцыйны прадстаўнік Гомельскага абласнога МНС Марыя Клязовіч: «Не будзем згушчаць фарбы, на дадзены момант жыццядзейнасць на падтопленых падворках не парушана. Мы маніторым сітуацыю, у любы момант пры яе пагаршэнні ў ратавальнікаў ёсць усе сілы і сродкі, каб эвакуіраваць людзей і свойскую жывёлу ў бяспечныя месцы».

Начальнік Петрыкаўскага РАНС Ігар ХАЦЯНОВІЧ гутарыць з жыхаркай вёскі Хвойня Евай РЭПIК

Па стане на 10 студзеня невялікі сутачны рост узроўняў вады з інтэнсіўнасцю да 8 см назіраецца на ўсім працягу Прыпяці, асобных участках Дняпра, Бярэзіны і Сожа. На большасці рэк вада знаходзіцца на пойме. Узроўні вады перавышаюць небяспечныя высокія адзнакі на прытоку Сожа рацэ Проня ля вёскі Ляцягі на 10 см (сутачны спад складае 4 см), на прытоку Прыпяці рацэ Случ ля вёскі Ленін на 10 см (сутачны спад складае 1 см).

Ледзяныя ўтварэнні ў выглядзе снежуры і закрайкаў з’явіліся ў вярхоўях Заходняй Дзвіны, Дняпра і Сожа, на асобных участках Нёмана і Прыпяці, а таксама на некаторых малых рэках. На Чыгірынскім і Заслаўскім вадасховішчах, возеры Нарач і возеры Чырвонае адзначаюцца закрайкі і закраіны. На вадасховішчы Чырвоная Слабада ўстанавілася тонкае ледзяное покрыва. Тут выходзіць на лёд вельмі небяспечна. У бліжэйшыя дні гідролагі Гідрамета прагназуюць на рэках пераважна спад узроўняў вады. Лёдаўтварэнне на iх працягнецца.

sb_gomel@mail.ru,

gorbatenko_inna@mail.ru

Полная перепечатка текста и фотографий запрещена. Частичное цитирование разрешено при наличии гиперссылки.
Заметили ошибку? Пожалуйста, выделите её и нажмите Ctrl+Enter
Загрузка...