На першай Венецыянскай біенале ў 1895 годзе былі прадстаўлены работы майстроў з 16 краін. З гадамі форум толькі пашыраўся. Сёлета на біенале былі размешчаны ўжо 90 нацыянальных павільёнаў. Яе асноўнай тэмай стала жыццё ў эпоху змен. Мастацкія праекты з розных краін паднялі важныя і вострыя праблемы сучаснасці. Беларускі праект EXIT прапанаваў погляд на сучаснага чалавека, на яго адчуванні і збянтэжанасць, на тое, як ён змяняецца пад уплывам сацыяльна-палітычных, часавых ваганняў. Экспазіцыя праекта будуецца на прасторавым узаемадзеянні пяці мультымедыйных аб’ектаў.
— Фігуры абязлічаны часам, — гаворыць Канстанцін Селіханаў. — Яны не маюць твару. Людзей вызначаюць рэчы.
Сярод іх — тэлевізар, неонавая шыльда, скрыні, лозунг, паднос са шклянкамі з малаком… Фігура чалавека, які трымае паднос, да прыкладу, пераносіць нас у дзяцінства мастака. Аўтар успамінае, як у дзіцячых садках усім давалі малако. У гэтай рабоце мастак жадаў паказаць, як з маленства ўсіх жадаюць падвесці пад стандарты.
Пазнаёміцца з праектам і паразважаць на філасофскія тэмы можна ў Нацыянальным цэнтры сучасных мастацтваў да 20 студзеня.