— Выстаўку рыхтавалі каля чатырох месяцаў. Экспанаты — з фондаў Дзяржаўнага музея гісторыі беларускай літаратуры, Беларускага дзяржаўнага архіва-музея літаратуры і мастацтва, музея «Гасцёўня Уладзіслава Галубка», сямейных архіваў пісьменнікаў, — паведаміла куратар выставы Святлана Кажамяка.
Экспазіцыя напоўнена фотаздымкамі, асабістымі рэчамі, кнігамі, рукапісамі і машынапісамі, якія добра расказваюць пра жыццё і творчасць драматургаў. Да прыкладу, дачка Андрэя Макаёнка Ала Гаўрылавец падзялілася рэдкімі кадрамі з жыцця пісьменніка — Андрэй Ягоравіч стаіць са сваёй сям’ёй. Бачым на выставе і гадзіннік, падораны Алесю Петрашкевічу за ўдзел у фестывалі народнага гумару «Аўцюкі-2000». Прадстаўлена шмат узнагарод пісьменніка. Цікавыя экспанаты — праграмы спектакляў Тэатра юнага гледача, у якім Аляксей Дудараў некаторы час працаваў акцёрам. Змешчана яго кніга прозы
«Святая птушка», многія апавяданні з якой перакладзены на іншыя мовы.
Шмат экспанатаў расказваюць пра спектаклі па п’есах юбіляраў. На выставе бачым фотаздымкі з рэпетыцый, касцюмы акцёраў і гэтак далей. Літаратурна-дакументальная экспазіцыя «Творчасць як жыццё…» будзе працаваць да 21 студзеня 2021 года.
infong@sb.by
Фота аўтара