За станам і бяспечнай эксплуатацыяй цепласеткі спецыялісты зараз сочаць на адлегласці.
Труба пасылае сігнал
Служба дыягностыкі цеплавых сетак і абсталявання філіяла «Мінскія цеплавыя сеткі» РУП «Мінскэнерга». Начальнік службы Дзмітрый Волчэк уважліва разглядае карту на маніторы. На ёй змейкай жоўтага колеру ўецца вуліца Чырвонаармейская. Для спецыяліста гэта магістраль цепласеткі № 30, стан якой ён кантралюе на адлегласці. Магістраль перакладзена папярэдне ізаляванымі трубамі і абсталявана сістэмай аператыўнага дыстанцыйнага кантролю. У арсенале спецыялістаў сёння — кантролеры, якія дазваляюць здымаць паказанні ў рэжыме анлайн. Яны ўсталёўваюцца ў цеплавых вузлах жылых дамоў, цэнтральных цеплавых пунктах, квартальных пунктах уліку цяпла, падключаюцца да сігнальных праваднікоў ПІ-трубаправодаў і па канале GSM бесперапынна перадаюць звесткі аб стане ізаляцыі трубы ў службу дыягностыкі. Таксама інфармацыя паступае на працоўныя месцы інжынераў раённых цеплавых сетак (а іх у філіяле «Мінскія цеплавыя сеткі» РУП «Мінскэнерга» восем). Дарэчы, адзін мадэм можа кантраляваць да двух кіламетраў сетак, якія ўтвараюць агульную сетку.Пакуль мы размаўляем з Дзмiтрыем, адзін з участкаў карты пачырванеў, а ў графе паказанняў супраціўлення праваднiкоў выскачыла слова «абрыў». Сістэму, якая выйшла са строю, з дапамогай вымяральнага прыбора агледзіць спецыяліст дыягностыкі. Ён жа на месцы ўсталюе прычыну пашкоджання. Часта праблемы бываюць дробнымi, нязначны рамонт можна зрабiць без дапамогi.
З падрабязнасцяў даведваюся, што сігнальны праваднiк, які выводзіцца ў адмысловыя вымяральныя тэрміналы, пракладзены па ўсёй даўжыні трубаправода. Сістэма дазваляе адшукаць месца ўвільгатнення трубы. І, такім чынам, прадухіліць далейшае развіццё вонкавай карозіі і пашкоджанняў. Дарэчы, больш за 90 працэнтаў пашкоджанняў адбываецца з-за вонкавай карозіі трубаправода. Іржу ўтварае антыгалалёдная сумесь з вялікай колькасцю солі. Каб папярэдзіць падобную непрыемнасць на кіламетрах падземных сетак, патрэбныя сучасныя тэхналогіі.
— Сістэму перадачы паказанняў па каналах GSM мы ўкараняем апошнія тры гады. Сёння ёй абсталяваны 130 кіламетраў ПI-труб, дарэчы iмi перакладзена ўжо 800 кіламетраў цеплатрас. Усяго на балансе прадпрыемства — 2600 кіламетраў труб, — удакладняе намеснік галоўнага інжынера філіяла «Мінскія цеплавыя сеткі» РУП «Мінскэнерга» Андрэй Жэшко. Камунальнікі гавораць, што перакладваць трубы новымі — вельмі дарагія праекты, таму з распаўсюджваннем такіх тэхналогій прыйдзецца пачакаць.
Скараціць тэрміны планавага адключэння гарачай вады можна. Першыя вынікі ў Мінску ўжо ёсць. Сёлета жыхары дамоў у межах вуліц Сурганава — Бяды — Някрасава — Багдановіча атрымалі гарачую ваду праз 7 дзён. Але для гэтага спатрэбілася перакласці ўсе цепласеткі ПI-трубамі. Мерапрыемства дарагое і не імгненнае.
Не трэба спяшацца
Такім чынам без штогадовых выпрабаванняў цепласетак усё роўна не абысціся. А правяраюць іх на трываласць і шчыльнасць высокім ціскам гідраўлічнай апрасоўкі. На гэта можа спатрэбіцца да трох сутак. Раней цепланосьбіт астуджваюць. Гэта яшчэ суткі. На ліквідацыю пашкоджанняў, якія могуць «стрэліць» у любы момант, таксама патрэбны час. І неабходнасць гэтая тым часцей узнікае, чым старэй квартал горада і чым больш зношаныя ў ім цепласеткі. Трэць участкаў гарадскога трубаправода не праходзіць выпрабаванні з першага разу. Вось вам і два тыдні без вады. А яшчэ ў гэты тэрмiн уваходзяць рэгламентныя і рамонтныя работы. Бо цепласетка не проста сталёвая труба, па якой бяжыць вада, на ёй шмат іншага абсталявання, якое патрабуе абслугоўвання.Прыбор для дыягностыкі сістэм кантролю.
Адключэнне гарачага водазабеспячэння і выпрабаванні праводзяцца яшчэ і таму, што гэта патрабаванні нарматыўных дакументаў. Так што мы можам казаць пакуль толькі аб скарачэнні тэрмінаў. Тым больш такое ў гісторыі ўжо здаралася. Некаторыя гараджане памятаюць, як калісьці адключэнне гарачай вады доўжылася не 14, а 28 дзён.
КАМПЕТЭНТНА
Святлана ЦІМОШКІНА, начальнік аддзела энергетыкі і надзвычайных сітуацый Міністэрства жыллёва-камунальнай гаспадаркі:
— На балансе арганізацый ЖКГ — 15,2 тысячы кіламетраў цеплавых сетак. Больш за 9 тысяч з іх заменена з выкарыстаннем ПІ-труб. З 2007-га штогод мяняецца не менш за 4 працэнты цепласетак ад агульнай працягласці. У планах на гэты год — перакласці 649,2 кіламетра.
Адключэнне гарачага водазабеспячэння пры прафілактычным рамонце цеплавых сетак максімум на 14 дзён — норма. Гэтых тэрмінаў прытрымліваюцца ва ўсіх рэгіёнах краіны. Толькі ў выключных выпадках іх можна павялічыць. Напрыклад, пры правядзенні вялікага аб’ёму рамонтных або будаўнічых работ. Новыя тэрміны абавязкова ўзгадняюцца з мясцовымі выканаўчымі і распарадчымі органамі.
ФАКТ
У гэтым годзе філіял «Мінскія цепласеткі» абвясціў тэхналагічны перапынак выпрабаванняў трубаправода на час правядзення II Еўрапейскіх гульняў-2019.
ДАРЭЧЫ
Сёлета спісы адключэння гарачага водазабеспячэння ў мінскіх дамах апублікаваны на ўвесь сезон, а не на месяц, як раней.