На выпадак моцнай непагадзі дарожныя службы Мінска могуць прыцягнуць дадаткова каля 650 адзінак тэхнікі.
Дастаткова складаная мінулая зіма паказала, што нашы дарожныя службы здольныя справіцца з любымі капрызамі надвор’я. Начальнік Галоўнага ўпраўлення аўтамабільных дарог Міністэрства транспарту і камунікацый Аляксандр Галаўнёў — аб падрыхтоўцы да будучага асенне-зімовага сезона:
— У цэлым па арганізацыях рэспубліканскіх аўтамабільных дарог патрабуецца на зімовы перыяд 2021–2025 гадоў амаль 400 тысяч тон пясчана-салянай сумесі і каля 350 тысяч тон соляў. Праца па нарыхтоўцы пачата і працягваецца. Паралельна рыхтуем дарожную тэхніку. Усяго на зіму мяркуецца задзейнічаць амаль 60 адзінак ротарнай тэхнікі, 650 адзінак пескасолеразмеркавальнай і каля тысячы адзінак снегаачышчальнай.
— Падрыхтоўка і рамонт снегаўборачнай тэхнікі ідуць па графіку. Плануем завяршыць да 25 верасня і распачаць яе пераабсталяванне пад зімовы перыяд. Усяго ў нашым аб’яднанні знаходзіцца 760 адзінак снегаўборачнай тэхнікі, — агучыў лічбу галоўны інжынер ДВА «Гаррамаўтадар Мінгарвыканкама» Павел Важнік. — Аўтапарк рэгулярна абнаўляецца. У мінулым годзе, напрыклад, ён папоўніўся 12 адзінкамі спецтэхнікі. Набываем яшчэ 40 адзінак!
На выпадак моцнай непагадзі заключаны дамовы з іншымі арганізацыямі. Гэта дазволіць прыцягнуць дадаткова каля 650 адзінак тэхнікі. Таксама ў Мінску працягне сваю працу снегаплавільны пункт. Яго прадукцыйнасць — 5000 «кубоў» у суткі!
— У гаспадарчым распараджэнні нашага прадпрыемства знаходзіцца 24,6 млн квадратных метраў вулічна-дарожнай сеткі, 105 мастоў і пуцеправодаў, 98 падземных пераходаў, — пералічыў Павел Важнік. — У бягучым годзе ў аб’яднанні былі запланаваны рамонтныя мерапрыемствы на праезнай частцы агульнай плошчай каля 900 тысяч квадратных метраў на 1 жніўня выкананы работы на плошчы 1,036 мільёна квадратных метраў — гэта 116 працэнтаў ад плана.
Пры гэтым, паводле яго слоў, на 58 участках вулічна-дарожнай сеткі плошчай каля 600 тысяч «квадратаў» праведзена поўная замена асфальтабетоннага пакрыцця. Ліквідацыя ямачнасці, калейнасці і рамонт тратуараў выкананы ў поўным аб’ёме.
Напрыканцы размова зайшла аб экалагічнасці метадаў, якія ўжываюцца для барацьбы з зімовай слізкасцю.
— Мы пастаянна праводзім маніторынг рэагентаў, якія з’яўляюцца, вывучаем іх эфектыўнасць, суадносіны цаны і плавячай здольнасці, — адказаў на пытанне журналістаў Аляксандр Галаўнёў. — Быў у нас вопыт прымянення меласы (пабочнага прадукту цукровай вытворчасці. — Заўв. рэд.). Паспрабавалі — аказалася, у яе недастатковая плавячая здольнасць. Даводзілася павялічваць аб’ёмы пасыпак... У яе ёсць яшчэ адзін негатыўны эфект — тлустасць. Абрастанне машын і абутку тлушчам — гэта таксама нядобра. Практыка паказала, што хлорысты натрый падыходзіць для нашых умоў лепш за ўсё. Справа ў нормах высыпак, яны ў нас дакладна вызначаны. Бо не проста так уся пескасолеразмеркавальная тэхніка атэстуецца на нормы высыпу. Калі па нормах належыць сыпаць 25 грамаў, значыць, апарат павінен сыпаць 25 грамаў, а не 40.
— У Мінску выкарыстоўваецца абсталяванне для падрыхтоўкі саляных расолаў, якое зніжае выдзіманне саляных сумесяў на зялёныя зоны, паляпшае працу самой сумесі, — дадаў у канцы Павел Важнік. — За кошт гэтага адбываецца зніжэнне расходу. Сёлета плануем павялічыць парк тэхнікі, якая будзе выкарыстоўваць саляныя растворы.
gorbatenko@sb.by