Трап пададуць да Еўрагульняў

Атракцыёны, валютаабменныя машыны, кітайская мова - як аэрапорт рыхтуецца да Еўрагульняў

З увядзеннем “бязвізу” ў краіну больш актыўна пацягнуліся турысты з розных куткоў свету. Шмат гасцей прыбывае ў Нацыянальны аэрапорт Мінск: за восем месяцаў бягучага года ён абслужыў на 23% пасажыраў больш, чым за аналагічны перыяд мінулага. Аэрапорт будаваўся ў 1983 годзе як рэгіянальны, яго памеры не прадугледжвалі такога вялікага патоку людзей і грузаў. Наперадзе Еўрагульні-2019 і чэмпіянат свету па хакеі - 2021. Карэспандэнт “Р” даведалася, як Нацыянальны аэрапорт Мінск рыхтуецца да грандыёзных падзей.


Пакуль стаю каля інфармацыйнай стойкі тэрмінала, шукаю вачыма прыкметныя “абноўкі”. Аднак нічога дзіўнага пакуль не заўважаю. Найбольшую ўвагу прыцягваюць кучы пяску ўдалечынi ад тэрмiнала: там будуецца новая “ўзлётка”.

- Не хвалюйцеся, нам сапраўды ёсць што паказаць, хоць адразу гэта, можа, і непрыкметна, - зацікаўлівае прэс-сакратар РУП “Нацыянальны аэрапорт Мінск” Раміна Саматханава. - Вось нават гэтыя дзіцячыя атракцыёны - каруселька, машынкі, рэдлайнерс - месяц таму іх яшчэ не было. Зараз дзіцячая пляцоўка значна пашырылася.   


Падыходзім да стойкі для зарадкі гаджэтаў. Тут можна “падсілкаваць” тэлефон, планшэт ці ноўтбук зусім бясплатна. Па ўсім аэрапорце такіх памочнікаў раскідана больш за дзясятак. Дарэчы, калі сусветная тэндэнцыя ідзе да атрымання прыбытку нават на Wi-Fi, у нашым аэрапорце перавагу аддаюць інтарэсам спажыўцоў. З мая  можна бясплатна “сядзець” у інтэрнэце тры гадзіны з аднаго прыстасавання.    


Таксама пасажыры атрымалі магчымасць сэканоміць час на друкаванні пасадачных талонаў. У гэтым дапамагаюць чатыры спецыяльныя прынтары, якія счытваюць з электронных прыстасаванняў найбольш распаўсюджаныя коды - QR, Data Matrix і Aztec. Прычым зусім бясплатна. Персанал аэрапорта паспрабаваў здзівіць пасажыраў апаратам для друкавання сэлфі. Між іншым, ён карыстаецца папулярнасцю.

- Мы ў два разы пашырылі пункты даглядання саюзнага сектара вылету і абсталявалі іх самымі новымі прыладамі для гэтага. Што зрабіла працэдуру даглядання хуткай і камфортнай, - працягвае Раміна Саматханава. - Цяпер мы працуем над заменай тэлескапічных трапаў. Два з іх ужо запрацавалі. Яшчэ чатыры запусцяць да канца года. Плануем узвесці яшчэ адзін дадатковы.  


Пакуль ідзём да перавалачнага пункта сняданку, заўважаю: пасажыраў раніцай зусім няшмат - сядушкі ў залах чакання амаль пустыя, каля некалькіх кас тэрмінала абслугоўваюцца два-тры пакупнікі. Для ажыятажу яшчэ ранавата: час пiк пачнецца дзесьці з 10-й раніцы.

Доўгая і грунтоўная падрыхтоўка аэрапорта да “бязвізу” дазволіла перажыць новаўвядзенне без значных узрушэнняў і працаваць у штатным рэжыме. Толькі вось з прытокам пасажыраў узнікла праблема з наяўным абменам валют. Каб зняць яе, адміністрацыя вырашыла абсталяваць установу валютаабменнымі машынамі. Яны будуць працаваць разам з двума абменнымі пунктамі. Адна такая машына ўжо ўстаноўлена на тэрыторыі VIP-залы, другая - у саюзным сектары прылёту 5-6. Прыстасаванне мяняе расійскія рублі, еўра і долары на нашы рублі. У хуткім часе будзе абменьвацца і кітайскі юань. Дарэчы, на ўказальніках і іншай даведачнай інфармацыі да рускай і англійскай моў далучыцца кітайская. 

Да Еўрагульняў і ЧС па хакеі ў аэрапорце плануюць пашырыць кропкі грамадскага харчавання. 

- Канешне, да масавых мерапрыемстваў будзем змяняць і рацыёны. Пераважаць будуць стравы з нацыянальным ухілам, - дзеліцца планамі кіраўнік службы “Кэтэрынг” Алег Духноў.


Выдатна апошнім часам аэрапорт папрацаваў над удасканаленнем безбар’ернага асяроддзя. Тут арганізавалі два месцы сустрэчы людзей з інваліднасцю. Пры неабходнасці кліенты могуць скарыстацца радыёдаведкай, крэслам-каталкай ці амбуліфтам пры перамяшчэнні на борт на калясцы. Зараз аэрапорт сумесна з Беларускім таварыствам інвалідаў па зроку вырашае пытанне па навігацыі для пасажыраў, слабых на зрок.

Што рабіць, калі замарыўся пры пералётах, а да наступнага рэйса засталося яшчэ шмат часу? Можна скарыстацца кабінамі для сну ў бізнес-зале. Гэтыя кабіны ўяўляюць сабой міні-пакойчык з ложкам, сталом і паліцамі, дзе можна застацца сам-насам з сабой і адпачыць. Усяго кабiн для сну 11. Прычым адна з іх - для інвалідаў - з пандусамі і поручнямі, дадатковым месцам для каляскі. 


- Калі ў чалавека ёсць час, чаму б не скарыстацца такой кабінай? Кошт яе - 20 долараў за тры гадзіны. Гэты час можна працягнуць ці, наадварот, паменшыць. Усё для камфорту кліента, - тлумачыць адміністратар бізнес-залы. - Кабіны дастаткова гукаізаляваныя. Пры неабходнасці нашы супрацоўнікі пабудзяць пасажыраў. Гэта не праблема.


Вакол будынка аэрапорта таксама ўсё мяняецца ў лепшы бок. Цяпер паток транспарту, які пад’язджае да яго, раздзяляецца. Грамадскі транспарт і афіцыйны трансфер падвозяць пасажыраў па новай паласе да самага ўваходу ў пабудову тэрмінала, а прыватныя аўто спыняюцца на стаянках каля аэравакзала. 

Дарэчы, спецыяльна арганізаваны афіцыйны трансфер аэрапорта прапануе паслугу дастаўкі пасажыра ў любую кропку Мiнска па фіксаванай цане - 30 беларускiх рублёў. Тарыф на перавозкі па ўсёй краіне залежыць ад кіламетражу і часу. З’явіліся на вуліцы і асобныя зоны для курэння. 

Удалечыні відаць, як ідзе праца па будаўніцтве другой узлётна-пасадачнай паласы.



- Плануецца, што да Еўрагульняў другая “ўзлётка” будзе пабудавана. Яна дазволіць нам прымаць усе тыпы паветраных судоў, нават Airbus A380 - найбуйнейшы серыйны авіялайнер у свеце, - дзеліцца падрабязнасцямі будоўлі Раміна Саматханава. - Аздабленне паласы сучасным светасігнальным абсталяваннем дазволіць лайнерам без цяжкасцяў садзіцца і ўзлятаць у любы час і пры любым надвор’і. 

Канешне, з новай “узлёткай” пасажыра- і грузапаток рэзка павялічыцца. Напрошваецца пытанне пра будаўніцтва другога аэравакзальнага комплексу. Сённяшні тэрмінал разлічаны на 5-8 мільёнаў пасажыраў у год. За 2016 год праз аэрапорт прайшло каля 3,5 мільёна. Таму пытанне, пагадзіцеся, даволі актуальнае. 

Што ж, пакуль аэрапорт рыхтуецца да будучых падзей, будзённых спраў ніхто не адмяняў. Зусім нядаўна, у сярэдзіне верасня, тут урачыста сустрэлі трохмільённага пасажыра. Ён прыляцеў з Дамадзедава рэйсам авіякампаніі “Белавія”. Чатырохмільённага пасажыра плануюць сустрэць у сярэдзіне снежня.

КОРАТКА

За сем мінулых месяцаў у бязвізавым парадку праз пункт пропуску дзяржграніцы “Нацыянальны аэрапорт Мінск” у краіну прыбыло больш за 46 тысяч замежнікаў. У першую чаргу гэта грамадзяне Еўрасаюза і Лацінскай Амерыкі. 

ВЫНАСКА

Другая “ўзлётка” дазволіць прымаць усе тыпы паветраных судоў, нават Airbus A380 - найбуйнейшы серыйны авіялайнер у свеце.

veronulas@sb.by

Фота Паўла Чуйко
1/
Заметили ошибку? Пожалуйста, выделите её и нажмите Ctrl+Enter
Версия для печати
уже проходили...
Так,Еурагульнi,гэта наша усё.
Тутэйшы
Китайская мова, Еурагульни. Ну ок.
Заполните форму или Авторизуйтесь
 
*
 
 
 
*
 
Написать сообщение …Загрузить файлы?