Напрыканцы года ў пункце пропуску «Казловічы» пачне працаваць пілотны праект сістэмы электроннага браніравання чаргі для грузавых аўтамабіляў. Дзяржпагранкамітэт стварае яе, каб выключыць магчымасць прастояў машын на беларуска-польскай мяжы.
Каб пакінуць заяўку на перасячэнне мяжы, вадзіцелю ці перавозчыку трэба будзе толькі зайсці на сайт Дзяржпагранкамітэта і выбраць даступны для праезду час на пункце пропуску, уключаным у электронную сістэму. Перад мяжой вадзіцель зарэгіструецца ў спецыяльнай сэрвіснай зоне і будзе чакаць у ёй праходжання мяжы ад 10 да 20 хвілін. Перасячы граніцу можна будзе і без электроннай чаргі, але рэгістрацыя ў сэрвіснай зоне ўсё адно абавязковая.
Разам з пытаннем чэргаў вырашаецца праблема з адпачынкам і харчаваннем вадзіцеляў. У сэрвіснай зоне будуць усе неабходныя аб’екты: гасцініцы, кавярні, рамонтныя майстэрні, запраўкі.
