На прэзентацыі зборніка вершаў Рыгора Бабчанка «Вяртанне» ў Ельскім раённым Доме культуры «Колас» не было свабодных месцаў
На прэзентацыі зборніка «Вяртанне» доктар сельскагаспадарчых
навук, ганаровы грамадзянін Ельскага раёна Міхаіл КАДЫРАЎ,
дырэктар саўгаса «Камуніст» Рыгор БАБЧАНОК,
дырэктар дапаможнай школы-інтэрната Якаў ЛІПСКІ,
пісьменнік Уладзімір ЛІПСКІ.
ТАКАЯ ўвага да паэтычнага слова тлумачыцца проста. Аўтар — патомны хлебароб, дырэктар мясцовага саўгаса «Камуніст» Рыгор БАБЧАНОК. Рыгор Уладзіміравіч амаль дваццаць гадоў кіруе адной з самых моцных гаспадарак гомельскага Палесся. Яна нарадзілася ў балотах 40 гадоў таму разам з адваяванымі ў багны палямі і сенажацямі, пабудаванымі з нуля сядзібамі. Зараз пасёлак Зашыр’е, дзе размясцілася цэнтральная сядзіба саўгаса, нават не аграгарадок у звычайным сэнсе. Гэта невялікі па памерах горад з асфальтаванымі вуліцамі, скверамі, шматпавярховымі дамамі і фантанамі. А галоўны прынцып тут — «У Зашыр’і жыць не гожа — незаможна, непрыгожа».
Зразумела, падтрымать свайго кіраўніка прыехала ў райцэнтр нямала зашырцаў. Сярод іх пераможцы фестывалю-кірмашу «Дажынкі» розных гадоў Віктар Кашэвіч, Рыгор Казачэнка, Уладзімір Давыдзюк. А ўсяго іх каля дзесяці. Соллю зямлі назваў палескіх хлебаробаў ганаровы госць, вядомы беларускі пісьменнік Уладзімір Ліпскі. А шматлікіх жураўлёў у гэтых мясцінах — сімвалам урадлівасці і заможнасці.
Кожны амаль з шасці тысяч гектараў сельгасугоддзяў гаспадаркі — асушаныя землі. Капрызныя тарфянікі не заўсёды дзякуюць сваім пакаральнікам. Але ж дзякуючы намаганням руплівага гаспадара з душой паэта стабільна атрымліваюць высокія ўраджаі зерня і траў. Аб гэтым гаварыў на вечарыне доктар сельскагаспадарчых навук, ганаровы грамадзянін Ельскага раёна Міхаіл Кадыраў.
Ёсць у Рыгора Бабчанка яшчэ адна грамадская пасада. Аб ёй мала хто ведае. Ён ганаровы дырэктар Ельскай дапаможнай школы-інтэрната. На сталах дзяцей са складаным лёсам садавіна і гародніна з саўгаса «Камуніст». Тут жа яны атрымліваюць свае першыя працоўныя ўрокі.
Па словах кіраўніка ўстановы, аднаго з ініцыятараў імпрэзы, Якава Ліпскага, пуцёўка ў жыццё пачынаецца менавіта з зямлі. Яна дае і вытокі для натхнення. Таму шмат аматараў паэзіі ў раёне. Нават заснавана літаратурнае аб’яднанне. А самі выхаванцы школы-інтэрната падрыхтавалі некалькі шчырых і цікавых музычна-паэтычных нумароў.
Гучалі на прэзентацы і вершы. Што адметна, іх чыталі прадстаўнікі самых розных прафесій, сталыя і маладыя. Жыве яшчэ роднае слова ў палескай глыбінцы!
...Сады, палеткі, зеляніну
І майскай ночы цеплыню.
Сваё жыццё, сваю краіну
На рай замежны не змяню!
Аляксандр ШАЎКО, «СГ»
shevko@sb.by
Фота Аляксандра ГАЗУКІ
