Дзмітрый трасе балончык з фарбай.
— Вы першая, хто ўбачыць канчатковы варыянт! — радуе майстар і лезе на лясы.
Большую частку малюнка малады ўладальнік дызайн-студыі выконваў пэндзлем і валікамі, балончык — для адценняў і пераходаў. 10 хвілін — і графіці закончана. Майстар пачынае спускацца.
— Не страшна па лясах туды-сюды скакаць?
— Ужо 10 гадоў гэтым займаюся. Хочаш рабіць манументальныя творы — вучыся лазіць!
Дзмітрый задаволена аглядае графіці. Каб скончыць работу ў 64 квадратныя метры, спатрэбілася 9 дзён з рэжымам працы з 9 раніцы да 6 вечара.
— Надпіс пад Скарынай «Святло ведаў перамагае цемру невуцтва». Адкуль гэта фраза?
— Сам прыдумаў! Толькі доўга сумняваўся, як правільна, нават кансультаваўся з беларусаведамі: «невуцтва» або «нявуцтва». Сказалі, што я маю рацыю.
Ад узнікнення ідэі да яе ўвасаблення прайшло шмат часу. Эстэтычная частка — верхавіна айсберга, прызнаецца майстар. Далей патрэбен шэраг узгадненняў, з якімі не кожны чалавек справіцца.
Наступны — крок фінансавы. Дзмітрый паспрабаваў сабраць грошы праз краўндфандынг, аднак патрымкі там не знайшоў. Тады вырашыў: мільянерам яго назваць нельга, аднак час і сродкі для сацыяльнага праекта вылучыць трэба, залез у запасы. Крыху дапамог і ўніверсітэт. Канчатковую суму майстар не называе, аднак удалося высветліць, што каштуе такое графіці каля 6—7 тысяч рублёў.
Па-за нашымі спінамі пачуўся вокліч захаплення, жанчына шэптам пачала гаварыць свайму спадарожніку, як ёй падабаецца малюнак.
— Пакуль працаваў, таксама падыходзілі людзі. Многа — якраз з гэтага корпуса. Дзякавалі.
Атрымалася сапраўды добра. З эстэтычнага боку графіці не выбіваецца з агульнага афармлення будынка, з сацыяльнага — яшчэ раз нагадвае пра родную мову і гісторыю.
Падарунак атрымаўся не толькі для гамяльчан, але і для самога Дзмітрыя. 4 жніўня ён адзначыў дзень нараджэння. Яго жаданне — каб твор не застаўся проста малюнкам. Пад ім можна праводзіць урачыстыя лінейкі для першакурснікаў ці проста прызначаць сустрэчы з сябрамі — «пад Скарынай».
— Я доўга кансультаваўся з профі і падбіраў якасныя фасадныя фарбы, каб роспіс, як стрыжка ў добрага цырульніка, з часам станавіўся толькі лепшым.
Дарэчы, у планах Дзмітрыя яшчэ некалькі сацыяльных праектаў для Гомеля, аднак пакуль сваіх задумак ён не раскрывае.
valchencko@mail.ru
Фота Івана КУЗМЯНКОВА
