Сумленне замучыла?

Выкладчык напрасілася на хабар, а потым прыйшла з пакаяннем

Незвычайны выпадак адбыўся ў Лідзе. Выкладчык адной з навучальных устаноў горада прызналася ў атрыманні хабару, даць ёй які сама ж і падштурхнула студэнтаў.

Напярэдадні экзамену па няпростым прадмеце «Перыферыйныя прылады і тэхнічныя сродкі перадачы даных» педагог абмовілася, што студэнты павінны ўжо ведаць, як здаюцца экзамены. Навучэнцы не разгубіліся і сабралі па 100 тысяч рублёў з кожнага.

Як паведамілі ва УУС Гродзенскага аблвыканкама, суму ў 2,9 мільёна рублёў 35-гадовай жанчыне дадому прывёз найбольш ініцыятыўны студэнт. Тады выкладчык расказала, у якой паслядоўнасці будуць раскладзены білеты на экзамене, падказала, дзе канкрэтна шукаць адказы на многія пытанні. У выніку ўсе навучэнцы здалі яго на адзнакі 9 і 10.

Праз некалькі дзён студэнт і атрымальнік хабару прыйшлі ў органы ўнутраных спраў з пакаяннем. У дачыненні да выкладчыка ўзбуджана крымінальная справа.

Заметили ошибку? Пожалуйста, выделите её и нажмите Ctrl+Enter