У сялянскіх сем’ях гэта быў гарачы або халодны суп, посны ці з дабаўленнем сала альбо мяса, калі яно было. Гатавалі яго як на вадзе, так і на квасе або кіслай заквасцы. А на стале ў багатых дамах гэта была страва з асаблівым рытуалам трапезы, піша эксперт беларускай і славянскай кухні, гісторык кулінарыі, аўтар кніг Алена Мікульчык. Тут бацвінне падавалі ў трох талерках. У першай быў уласна суп з бурачнага бацвіння, прычым абавязкова халодны. У другой — лёд. А ў трэцяй — адварная чырвоная рыба. Побач з талеркамі на стол клаліся дзве лыжкі і адзін відэлец. Адной лыжкай трэба было есці бацвінне, другой — падкладаць лёд, відэльцам адломлівалі кавалачак рыбы.
Бацвінне лічыцца летняй стравай. Але нашы продкі налаўчыліся гатаваць яго і зімой, прычым без усялякіх маразільнікаў. Яны з лета нарыхтоўвалі маладое лісце і сцёблы буракоў пры дапамозе марынавання, квашання і засолкі.
Вось адзін з самых простых рэцэптаў бацвіння на квасе. З інгрэдыентаў патрэбны пучок бурачнага бацвіння, некалькі свежых агуркоў, зялёная цыбуля, кроп, соль, цукар, вада і тры літры хлебнага квасу. Неабходна адварыць бацвінне ў падсоленай вадзе на працягу 15 хвілін, затым зліць ваду, бацвінне астудзіць і дробна нарэзаць. Змяшаць яго з нарэзанымі агуркамі і апусціць у квас, дадаць цукар, соль, зеляніну. Падаваць халодным.
mila@sb.by
