Па традыцыі цэнтральнай падзеяй свята стане Нацыянальны конкурс маладых выканаўцаў беларускай эстраднай песні. За Гран-пры будуць змагацца 20 артыстаў з усіх абласцей краіны. Канкурсанты павінны выканаць па два творы айчынных аўтараў на нацыянальнай мове. Творчае спаборніцтва адбудзецца на пляцоўцы Палаца культуры горада, а цырымонія ўзнагароджання пераможцаў — на сцэне Амфітэатра падчас урачыстага адкрыцця фестывалю, якое арганізатары абяцаюць зрабіць яркім і эмацыянальным. Салісты Нацыянальнага акадэмічнага канцэртнага аркестра пад кіраўніцтвам народнага артыста прафесара Міхаіла Фінберга прадставяць у гэты вечар прэм’еру канцэрта “Мелодыя лёсу”, прысвечанага 80-годдзю з дня нараджэння народнага артыста СССР і Беларусі Ігара Лучанка. Завершыць першы дзень форуму святочны феерверк. А на наступны дзень, 9 чэрвеня, жыхароў і гасцей горада запросяць у музычна-паэтычную гасціную “Малая радзіма — пачатак мой і выток”, на сустрэчу з заслужанай артысткай Тамарай Раеўскай і вялікі канцэрт з удзелам артыстаў беларускай эстрады.
mila@sb.by
Фота БЕЛТА.
