Макавы суп з абаранкамі
Для людзей, не знаёмых з каталіцкімі традыцыямі, гэта страва выглядае вельмі дзіўнай — макавы суп, ды яшчэ з абаранкамі? Трэба адзначыць, што з гэтай стравай нават не ўсе каталіцкія сем’і знаёмы. Але там, дзе яе гатуюць, рэцэпт перадаецца з пакалення ў пакаленне — гэта вельмі смачна і сытна.
Што бяром: 2 л вады, 100 г маку, пачак абаранкаў, цукар на смак.
Як гатуем: мак заліваем невялікай колькасцю вады, даём пастаяць з паўгадзіны, пасля чаго ваду зліваем, дадаём да маку 5 ст. л. цукру і здрабняем гэту сумесь у ступцы або блендэры, пакуль не пачне выступаць белае макавае малачко. Абаранкі кладзём у каструлю і заліваем крыху астуджаным (да 90–80 градусаў) кіпенем, накрываем крышкай. Пачакаўшы хвілін 5–7, калі абаранкі разбухнуць, дадаём макавую сумесь і цукар на смак. Ужываць макавы суп можна як цёплым, так і халодным.
Густы кісель
Кісель на калядны стол у каталіцкіх сем’ях прынята гатаваць вельмі густым. Яго ядуць лыжкамі, часта ўпрыкуску з булачкамі. Асабліва любяць гэту страву дзеці, якія ўспрымаюць такі кісель як жэле.
Што бяром: 1 л вады, 200 г замарожаных ягад, 7 ст. л. цукру, 5–6 ст. л. з горкай бульбянога крухмалу.
Як гатуем: ягады кладзём у каструлю, заліваем літрам вады, ставім на агонь. Калі вада закіпіць, крыху расціраем ягады таўкачом, каб атрымаць больш насычаны адвар, варым 5–7 хвілін. Пасля адвар працэджваем, дадаём цукар, размешваем. Перад тым як дабавіць крухмал, кладзём яго ў асобную міску, заліваем паўшклянкай халоднай вады, добра размешваем. Пасля тонкім струменьчыкам выліваем гэту сумесь у адвар, пастаянна яго памешваючы. Здымаем кісель з агню, разліваем па формах і ставім на холад да застывання.
Смажаны карп
Найчасцей карпа на свята запякаюць у духоўцы — гатаваць проста, а на стале цэлая рыбіна выглядае шыкоўна. Але ж якім смачным атрымоўваецца карп, пасмажаны на патэльні! Залацісты колер, хрусткая скарыначка, мяккае мяса — паспрабуйце абавязкова.
Што бяром: свежы карп, пшанічная мука, соль, чорны молаты перац, алей.
Як гатуем: чысцім і мыем рыбу, разразаем на стэйкі, крыху абсушваем кавалкі, пасля чаго солім і перчым іх. Абвальваем стэйкі ў муцэ з усіх бакоў. Паніроўка дапаможа зрабіць хрусткую залацістую скарыначку. Наліваем алей на патэльню і добра яе разаграваем на сярэднім агні, толькі пасля гэтага выкладваем карпа. Смажым кавалкі каля 7–10 хвілін з кожнага боку. Стэйкі карпа падаюць звычайна гарачымі, але і ў халодным выглядзе яны таксама вельмі смачныя.
mila@sb.by