Што далей?

Пасля шэрагу трагічных падзей свет ніколі не будзе ранейшы... Не паспелі родныя аплакаць ахвяр стральбы ў амерыканскіх Луізіане, Мінесоце і Мічыгане — паліцэйскіх і судовых прыставаў, — як зноў адбылася гібель прадстаўнікоў правапарадку: забіты трое паліцэйскіх, сямёра паранены ў горадзе Батон-Руж (Канзас-Сіці). З-за сапраўднай расавай вайны, якая апошнім часам разгарнулася на вуліцах гарадоў Злучаных Штатаў, колькасць нападаў афраамерыканцаў на паліцэйскіх проста зашкальвае. Нягледзячы на тое, што да перастрэлак у ЗША мы ўжо “прызвычаіліся”, зусім нечаканы рэзананс выклікалі жахлівыя здарэнні ў былых савецкіх рэспубліках Арменіі і Казахстане. У першым выпадку ўзброеная група апазіцыянераў захапіла заложнікаў у будынку паліцэйскай часці ў Ерэване, патрабуючы адстаўкі прэзідэнта і вызвалення лідара радыкальнага руху “Новая Арменія”. У другім — дзёрзкі абстрэл Алмалінскага РУУС у цэнтры Алматы, дзе загінулі некалькі чалавек: чацвёра паліцэйскіх, памежнік і адзін цывільны. Нурсултан Назарбаеў назваў крывавую расправу тэрактам. 

На фоне падобных міжнародных навін, і ў тым ліку няўдалай спробы ваеннага путчу ў Турцыі, жыхары ЕС выказваюць занепакоенасць небяспечным распаўсюджваннем ісламскага тэрарызму, які ўсё мацней уздымае галаву ў Старым Свеце. Дастаткова ўзгадаць атакі экстрэмістаў у Парыжы, Бруселі, масавую гібель людзей у курортнай Ніцы, напад афганскага бежанца, завербаванага “Ісламскай дзяржавай”, на пасажыраў цягніка ў Германіі. Што і дзе чакаць далей? 

Кіраўнік еўрапейскай памежнай службы Frontex Фабрыс Лежэры ўпэўнены: на тэрыторыю Еўрасаюза з пачатку 2016-га па канец красавіка пранікла больш за 360 тысяч нелегалаў. Хто сёння ведае, колькі з іх патэнцыяльных баевікоў?

Але сапраўдным інфармацыйным выбухам днямі з’явілася заява дырэктара ЦРУ Джона Брэнана з ацэнкай падзей на Блізкім Усходзе і ў Паўночнай Афрыцы: “арабская вясна” 2011 года, якая адбылася не без дапамогі ЗША, памылка знешняй палітыкі Вашынгтона. Вынік — рост  уплыву тэрарыстычных арганізацый. Гэтая пазіцыя была пацверджана і з’ездам амерыканскіх рэспубліканцаў: дэстабілізацыю Блізкага Усходу ажыццявілі прэзідэнт Барак Абама і былы дзяржсакратар Хілары Клінтан. Зразумела, што адпаведная рэзалюцыя прынята напярэдадні выбараў прэзідэнта ў гэтай краіне. Аднак сутнасці справы яна не меняе.

Вось такія навіны. Сустрэнемся...