Мы знаходзімся на вуліцы Прытыцкага, дзе раптоўна з'явіліся дзве ямы глыбінёй больш за пяць сантыметраў. Такая глыбіня лічыцца крытычнай.
— Яшчэ ўчора іх тут не было, — Канстанцін Кухарчук, майстар брыгады ўпраўлення «Цэнтр» ДВА «Гаррамаўтадар Мінгарвыканкама», паказвае на адну з выбоін памерам 30 на 30 сантыметраў.
Чацвёра рабочых пачынаюць яе ліквідаваць. Па-першае, выстаўляюць інфармацыйныя і папераджальныя знакі.
— Кожны дзень мы праводзім агляд праезнай часткі, ацэньваем стан асфальтабетоннага пакрыцця. Пасля, заўважыўшы пралом, стараемся ў самы кароткі тэрмін устараніць дэфекты, — тлумачыць прынцып работы майстар.
У яркай аранжавай форме рабочы Сяргей Бузо бярэ ў рукі нарэзчык, і на вуліцы становіцца шумна: ён выразае шырэй за контур выбоіны ўчастак асфальту. Пасля за справу бярэцца рабочы Мікалай Праташчык: разбівае адбойным малатком «карту» — так называюць рамонтны ўчастак. Затым «карту» ачышчае рабочы Аляксандр Пугач, а Аляксандр Арцяменя спецыяльнай тэхнікай яе прадзьмухвае. Дарэчы, тое, што дасталі з ямы, пазней адправяць на драбнілку, дзе перапрацуюць былы асфальт у асфальтабетонную крошку, якую можна выкарыстоўваць як будаўнічы матэрыял.
— Пакуль яшчэ ёсць мінусавыя тэмпературы, мы запаўняем выбоіну гарачымі літымі асфальтабетоннымі сумесямі. Яны часовыя. Заменім іх, калі будзе стабільна плюсавая тэмпература, — расказвае майстар Канстанцін.
Дзе бяруць сумесі? Кожную раніцу брыгада ездзіць за асфальтам на завод ААТ «Макрадор». Вось, напрыклад, на квадратны метр выбоіны глыбінёй у пяць сантыметраў патрэбна 120 кілаграмаў асфальту! Зараз каля нас у рамонтнай устаноўцы знаходзіцца тры тоны гарачага асфальту, якога хопіць толькі на адзін рэйс брыгады. Для таго, каб ён не застыў, рамонтная ўстаноўка па прынцыпе тэрмаса падтрымлівае неабходную для яго тэмпературу — 180 градусаў.
— Сярога, залівай! — дае каманду майстар, і «шматфункцыянальныя салдаты», як называе сваіх падначаленых Канстанцін, запаўняюць «карту» сумессю, мы бачым, як ад яе ідзе пара. Тут жа рабочыя ўсё акуратна ўкладваюць і папраўляюць, каб участак быў гладкім. Літаральна 20 хвілін — і ўсё застыне. А пакуль апошні штрых — зверху, для паляпшэння счаплення, сыплюць дробны друз.
— Працуем мы з 8 раніцы і да 18—19 гадзін вечара. Калі дзесьці ёсць крытычная ямачнасць, выязджаем на месца і ноччу, — распавядае Канстанцін Кухарчук. — Па начах стараемся працаваць у такіх праблемных месцах, як, напрыклад, скрыжаванні — днём там гэта немагчыма з-за інтэнсіўнага руху аўто. У дзень мы рамантуем каля 40 квадратных метраў вуліц. Для ямачнага рамонту ў залежнасці ад тэмпературы на вуліцы выкарыстоўваем розныя віды асфальтабетонных сумесяў: гарачыя, літыя, цвёрдыя, паўцвёрдыя і іншыя.
Ямы на вуліцах і дарогах могуць з'явіцца ў любую пару года, але ўсё ж вясна — час інтэнсіўнай працы
Першы намеснік генеральнага дырэктара ДВА «Гаррамаўтадар Мінгарвыканкама» Таццяна Сусекава кажа, што вясной і восенню ўсе вуліцы Мінска на планавым кантролі. Вось і зараз створаны рабочыя групы ў кожным з раёнаў горада — правяраюць, дзе неабходна «лячэнне», а дзе поўная замена асфальту.
— Усяго ў Мінску 1400 кіламетраў вулічна-дарожнай сеткі. Безумоўна, перапады тэмператур, перагруз дарог транспартам уплываюць на стан пакрыцця. Адмовіцца ад ямачнага рамонту мы не можам. Залатаныя выбоіны ёсць ва ўсіх краінах.
У тэму
Сёлета на рэспубліканскіх аўтамабільных дарогах плануецца адрамантаваць капітальным рамонтам 27,85 км дарог і 710,45 пагоннага метра маставых збудаванняў, бягучым рамонтам — 810,4 км дарог і 1696,7 пагоннага метра маставых збудаванняў. У Міністэрстве транспарту і камунікацый паведамілі, што запланаваны аб'ём рамонтных работ на рэспубліканскіх аўтамабільных дарогах складае 123,2 млн рублёў. Гэтага недастаткова для выканання ўсіх неабходных рамонтаў для прывядзення транспартна-эксплуатацыйнага стану дарог да нарматыўнага ўзроўню.
alinakasel@gmail.com