Як у Магілёве пабудавалі дзіцячы садзік у крэдыт

Праз некалькі дзён маленькіх навасельцаў прыме яшчэ адзін дзіцячы садзік. Для ажыццяўлення гэтага праекта Магілёўскі гарвыканкам упершыню ў сваёй практыцы пайшоў на эксперымент. Каб вырашыць праблему фінансавання знакавай новабудоўлі, горад сам пры пасярэдніцтве Мінфіна ўзяў спецыяльную пазыку. Карэспандэнт «Р» зазірнула ў новы садзік напярэдадні адкрыцця.

Яркая палітра жоўта-чырвонага трохпавярховага будынка выгадна вылучаецца сярод новабудоўляў

Некалькі прыпынкаў ад цэнтра горада, і я ў адным з самых маладых мікрараёнаў Магілёва. На самай справе ўзрост Казіміраўкі не такі і малы. Аднак за апошні дзясятак гадоў ён атрымаў велізарны штуршок да развіцця. Наваселлі, у тым ліку ў сацыяльных дамах, тут ладзяць штогод, і пераважна маладыя сем’і. Аднак да нядаўняга часу мясцовых хлопчыкаў і дзяўчынак прымалі толькі два дзіцячыя садзікі мікрараёна, якія ніяк не маглі задаволіць патрэбу ў падобнай паслузе. З адкрыццём трэцяга чарга бацькоў на ўлад­каванне іх дзяцей скароціцца да мінімуму. Гэтае свята плануецца прымеркаваць да дабрачыннай акцыі «Нашы дзеці». Карэспандэнт «Р» вырашыла зазірнуць у новы садзік раней, каб даведацца, як рыхтуецца персанал да прыёму ма­ленькіх навасельцаў.

Знайсці патрэбны адрас было няцяжка. Яркая палітра жоўта-чырвонага трохпавярховага будынка выгадна вылучаецца сярод новабудоўляў. Наверх вядуць адразу некалькі лесвіц. Усе тэматычныя. Мы з загадчыкам Ірынай Стражэвіч падымаемся па той, што прысвечана сезонам года. І, мінаючы зіму і восень, адразу трапляем у лета. Чыстыя, светлыя пакоі з новенькай мэбляй, цацкамі, кніжкамі сапраўды дадаюць летняга настрою. Улічваючы, што да адкрыцця зусім недалёка і да другога свята — казачнага Новага года, выхавальнікі і іх памочнікі ўпрыгожваюць вокны.  Анастасія Цішчанка пры гэтым не пабаялася па лесвіцы забрацца пад столь, каб асабіста прыладзіць каляровы шар. Разам са сваёй аднакурсніцай з Магілёўскага дзяржаўнага ўніверсітэта імя Куляшова Анастасіяй Траццяковай яна хутка прыме адну з дзіцячых груп:

— Такі вопыт у нас ужо ёсць. Мы стажыраваліся ў іншых садзіках Магілёва, таму ладзіць з малымі ўмеем.

Напачатку абедзве Анастасіі працаваць будуць пад кіраў­ніцтвам больш вопытных педагогаў. Самі дзяўчаты ды­пламаванымі спецыялістамі стануць у будучым годзе. І пасля гэтага змогуць выхоўваць малых ужо на пастаяннай аснове. Сярод выхавальнікаў ёсць і маці чатырох дзяцей Святлана Бурачэўская. У новы садзік хутка прыйдзе і яе чатырохгадовая дачка Ева. «Амаль два гады мы вазілі яе ў садзік у другі канец Магілёва. Нават на аўтамабілі гэта амаль паўгадзіны. Уявіце, якая для нас радасць — сад і работа для мамы побач з домам», — старэйшыя дзеці, падзялілася Бурачэўская, ужо школьнікі. А малодшы, двухгадовы Міша, спадзяецца магіляўчанка, хутка таксама стане выхаванцам новага садзіка. Для магіляўчанкі Наталлі Асмалоўскай адкрыццё «свайго» садзіка таксама падзея адметная: «Толькі ў маім пад’ездзе гэтага з нецярпеннем чакаюць пяць сямей. Сярод нас ёсць і шматдзетныя, таму час для нас вельмі дарагі. Цяпер не прыйдзецца марнаваць яго ў дарозе, і мы зможам больш увагі ўдзяляць сваім дзецям».

У садзіку, які хутка атрымае свой нумар — 117-ы! — усе ўмовы для развіцця. Музыкальная, танцавальная, спартыўная залы. Сучасны медыцынскі блок дазваляе адкрыць і сваю санаторную групу. Ірына Стражэвіч пералічыла:

— Тут ёсць кабінеты фізія-, святлолячэння, масажны. А яшчэ інгаляторый. Маем абсталяванне і для правядзення парафінавага прагравання дзіцяці.

Кухня таксама абсталявана па апошнім слове тэхнікі — так, каб якасць харчавання была вышэй, а стравы больш разнастайнымі. Дырэктар упраўлення капітальнага будаўніцтва горада Магілёва Андрэй Маскалёў удакладніў: згодна з тыпавым праектам у садзіку на 240 месцаў ёсць яшчэ і басейн.

Дарэчы, з моманту закладкі фундамента і здачы новага дзіцячага садзіка прайшло крыху больш за год. Старшыня Магілёўскага гарвыканкама Уладзімір Цумараў не хавае:

— Мы разумелі, наколькі неабходны гэты аб’ект. І не адмовіліся ад яго нават пры адсутнасці патрэбнага аб’ёму інвестыцый. Каб вырашыць праблему фінансавання, горад сам пры пасярэдніцтве Мінфіна ўзяў заём. Гэта першы падобны праект у гісторыі Магілёва. Але ж ён таго заслугоўвае, ці не так? Дзеці — наша будучыня. І яны, і іх бацькі павінны ведаць, што дзяржава пра іх клапоціцца. І робіць усё, каб у кожнага дзіцяці былі ўмовы для развіцця, выхавання і навучання.

Разглядаецца магчымасць будаўніцтва ў гэтым жа мікрараёне і агульнаадукацыйнай школы.

svet.markova@gmail.com

Фота аўтара