Гальшаны здаўна прыцягваюць людзей: раней — як важны палітычны і эканамічны цэнтр, сёння — як месца, поўнае міфаў і гісторый. Кажуць, у мястэчку да гэтага часу блукаюць прывіды Белай дамы і Чорнага манаха. Найбольшы наплыў турыстаў, вядома, на майскі фестываль. Падчас свята можна не толькі прасякнуцца духам рамантызму, гледзячы на руіны некалі велічнага і магутнага замка, але і самому акунуцца ў гісторыю. Паверце, калі побач змагаюцца рыцары ў даспехах, са сцэны гучыць сярэдневяковая музыка, навокал гандлююць металічнымі ўпрыгажэннямі, ногі самі нясуць у старажытны танец, а рукі цягнуцца да ганчарнага кола, ты сапраўды адчуваеш сябе чалавекам зусім не ХХІ стагоддзя.
Трапіць у мінулае на выхадных можна было яшчэ ў адным рэгіёне Гродзеншчыны. У Слоніме, родных мясцінах мецэната, паэта, кампазітара, заснавальніка традыцый тэатральнага мастацтва Міхала Казіміра Агінскага, прайшоў адкрыты фестываль “Паланэз”. У свяце музыкі і танца прынялі ўдзел творчыя калектывы з Беларусі, Польшчы, Літвы, якія прадставілі галоўны танец фэсту паланэз у розных варыяцыях.
Варта адзначыць, што “машына часу” не спыняе сваю працу — наперадзе цэлае лета фестываляў у розных кутках краіны, якія пазнаёмяць з рыцарскай культурай, старажытнай беларускай кухняй, даўнімі музычнымі традыцыямі, народнымі строямі і гэтак далей. Таму сачыце за афішамі і падарожнічайце з задавальненнем!
mila@sb.by
Фота: Віталія Піваварчыка, Святланы Муцянскай, slonves.by
