А вы заўважылі, як традыцыйныя пасхальныя (ці велікодныя — тут каму якое слова бліжэй) стравы ў наш час пераўтварыліся ў даволі выгадны бізнес? Гарадскія рэстараны, кафэ, пякарні і многія самазанятыя кандытары перад вялікім святам быццам уключаюцца ў спаборніцтва і імкнуцца здзівіць публіку не толькі формай і смакам пасхальнай выпечкі, але і неверагодным коштам на яе. «Куліч усяго за 47 рублёў» — такое рэкламнае паведамленне на днях прыйшло на мой тэлефон ад вядомай сталічнай сеткі кафэ. Аналагічныя прапановы трапляюцца і ў інтэрнэце: за маленькую здобу з пасхальным дэкорам у выглядзе гняздзечка с рознакаляровымі яйкамі ці зайчыкам з белага шакаладу пекары просяць у сярэднім ад 35 да 70 рублёў. Хапае і эксклюзіву — прадаюцца цяпер кулічы з моднымі начынкамі накшталт шакаладнага крэму, свежых ягад або арабскага цеста катаіфі. Каштуюць ад 50 да 100 рублёў. Бізнес, нічога асабістага.
Між тым у маёй сям’і пакупныя кулічы не прызнаюць зусім. Мы ў вёсцы нават печку зрабілі толькі для таго, каб на Пасху там булкі румяніліся і яйкі ў чыгунку з цыбульнікам фарбаваліся. Каб адчуць сапраўдную радасць набліжэння свята, нам не патрэбны ні модныя начынкі, ні трэндавы дэкор. Куды важней сабрацца ў бацькоўскай хаце, памаліцца і за няспешнымі размовамі пра тое, якімі добрымі гаспадынямі былі нашы прабабулі, замясіць цеста.
Вам спатрэбіцца (на 6 сярэдніх булачак):Мы гэта робім так. Награваем малако да тэмпературы 30–35 °С (яно павінна быць і не гарачым, і не халодным). Дадаём шафран, молаты кардамон, соль, цукар і дрожджы — добра перамешваем і пакідаем хвілін на 10. Тым часам топім сметанковае масла і астуджаем яго да хатняй тэмпературы. Добра прамываем разынкі і абсушваем іх. Далей прасейваем у дрожджы з малаком муку і паступова перамешваем. Дадаём жаўткі, ванілін, цэдру, разынкі, сметанковае масла. Далікатна, без рэзкіх, занадта энергічных рухаў замешваем цеста. Тут галоўнае — не спяшацца.
♦ малако 600 мл
♦ пшанічная мука 1 кг
♦ цукар 200 г
♦ дрожджы 20 г сухіх (або 40 г спрасаваных)
♦ жаўткі 5 шт.
♦ сметанковае масла 50 г
♦ разынкі 100 г
♦ шафран 0,5 ч. л.
♦ кардамон 0,5 ч. л.
♦ лімонная цэдра 0,5 ч. л.
♦ ванілін 1 пакецік (1,5 г)
♦ дробка солі
Для ўпрыгожвання:
♦ бялкі 5 шт.
♦ цукар 300 г
Цеста гатовае, калі не ліпне да рук. Кладзём яго ў таз ці вялікую каструлю, накрываем ручніком і пакідаем на гадзіну-паўтары ў цяпле. За гэты час цеста павінна павялічыцца ў 2–3 разы. Перад тым як раздзяляць яго на кавалкі, далоні смазваем алеем. Раскладваем цеста ў формы (іх папярэдне таксама прамазваем алеем) такім чынам, каб яно запаўняла не больш паловы. Даём адпачыць 30 хвілін. Адпраўляем кулічы ў разагрэтую да 180 °С духоўку прыкладна на 40 хвілін. Правяраем гатоўнасць зубачысткай або запалкай.
Класічную глазуру робім з цукру і бялкоў: узбіваем іх міксерам да густаты. Наносім на астуджаную выпечку.
kurak@sb.by
