Вядомы ўкраiнскi фотамайстар Iгар Гайдай робiць дзiвосныя адкрыццi ў звычайнай паўсядзённасцi
У Мiнску адкрылася выстаўка аднаго з самых вядомых украiнскiх фотамастакоў Iгара Гайдая. У беларускай сталiцы ён прадставiў работы з трох сваiх аўтарскiх праектаў: «Украiнцы», «Космас украiнскага хлеба» i «9+3».
— Для мяне фатаграфiя – гэта спосаб пазнання жыцця. Я аддаю перавагу вельмi простым iдэям, i праца над iмi заўсёды дорыць мне дзiвосныя адкрыццi, якiя iснуюць у паўсядзённасцi, — гаворыць Iгар Гайдай.
Напрыклад, штуршком да пачатку праекта «Космас украiнскага хлеба» сталi будзённыя наведваннi гастранома. Амаль штодня Iгар заходзiў туды за хлебам i кожны раз, трымаючы яго ў руках, звяртаў увагу на тыя цi iншыя загадкавыя, вельмi розныя, непаўторныя «рэльефы» на паверхнi свежага бохана – зморшчынкi, гарбiнкi, расколiны...
— Здавалася б, хлеб – звычайная рэч, прасцей простага, суправаджае чалавека ўсё жыццё, наладжана яго масавая вытворчасць, мiльёны адзiнак у дзень, а разам з тым у кожнага хлеба iндывiдуальныя рысы, ён — жывая культура, у iм — сакральная сiла, — разважае фотамастак.
Праект «9+3», цi больш дакладна «9 месяцаў + 3 днi», – зафiксаванае на звычайнай чорна-белай плёнцы i ад таго яшчэ больш выразнае сведчанне любовi i пяшчоты, у якiх купаецца толькi што народжанае дзiця. Ад здымкаў з выявамi шчаслiвых бацькоў, iх немаўлят ва ўзросце ад 3 хвiлiн да 3 дзён iдзе неймаверны iмпульс пазiтыўнай энергii.
I напамiн: кожны чалавек з’яўляецца на свет, каб быць шчаслiвым i любiмым.
Героi праекта «Украiнцы» – мужчыны, жанчыны, дзецi, людзi гарадскiя i вясковыя, простыя i знакамiтыя, парамi, тройкамi, паасобку, са свойскiмi жывёламi цi з рабочымi iнструментамi... Своеасаблiвы маштабны калектыўны партрэт нацыi – украiнцаў пачатку трэцяга тысячагоддзя.
Над гэтай серыяй (усяго ў ёй 120 фотаздымкаў, у Мiнску прадстаўлена толькi частка) майстар працаваў шэсць гадоў. Як расказаў Iгар Гайдай, асаблiвае ўражанне пакiнулi сустрэчы з простымi людзьмi. Яны з задавальненнем фатаграфавалiся, iм падабалася ўвага да сябе. Але цiкавасць з боку вядомага майстра выклiкала ў iх i пэўны скепсiс, маўляў, што за патрэба нас здымаць. Многiя так i не паверылi, што iх будучыя партрэты могуць быць апублiкаваны ў фотаальбоме цi экспанавацца на замежных выстаўках.
— Я адчуў, што гэтым простым людзям не хапае самадастатковасцi. Мне хацелася, каб мае здымкi сталi для iх свайго роду псiхатэрапiяй, каб праз iх яны адчулi сябе асобамi, дастойнымi ўвагi не менш, чым якiя знакамiтасцi, — гаворыць фотамайстар.
Работы Iгара Гайдая (а ўсяго iм створана каля дзесятка серый фотаздымкаў) аб’ехалi ўжо многiя краiны Еўропы. У Мiнску пазнаёмiцца з iмi можна да 15 сакавiка. Выстаўка размяшчаецца ў галерэi «Панарама» на 22-м паверсе Нацыянальнай бiблiятэкi. Дарэчы, вiд, якi адкываецца адтуль, вельмi ўразiў спадара Iгара. Не выключана, што сярод яго фотаработ з’явiцца цяпер i здымак з самай вышэйшай кропкi беларускай сталiцы.
На здымку: Iгар Гайдай.
Фота: Валерый ХАРЧАНКА
