Менш чым за паўгода дзякуючы падтрымцы дзяржавы, энергічнасці раённай улады і кіраўніцтва самой гаспадаркі і, у прыватнасці, яе дырэктара Багуслава Паўлоўскага на месцы былой фермы ўзнік прыгожы бела-блакітны тэнтавы арачнік для жывёлы. На яго пайшло каля 200 тысяч рублёў, палова з якіх выдаткавана з абласнога, рэспубліканскага і раённага бюджэтаў.
Днямі давялося пабываць на новым аб’екце, дзе ўтрымліваецца 196 цялят звыш чатырохмесячнага ўзросту. Нягледзячы на дваццаціградусны мароз на двары, у памяшканні было даволі камфортна, ва ўсялякім выпадку, вада ў паілках не замерзла. Жывёла знаходзіцца на беспрывязным утрыманні на падсцілцы з саломы. Па шырокім праходзе без перашкод рухаецца кормараздатчык. Сянаж, прыгатаваны ў стрэйч-плёнку, сена — высокага гатунку, і паядаюць іх цяляты з ахвотай.
Не толькі раздача кармоў, але і іншыя працэсы на ферме механізаваныя, што дазволіла абслугоўваючы персанал скараціць з дзесяці чалавек да чатырох.
Побач невялікі ўтульны домік для жывёлаводаў, у якім выдатная печка як для абагрэву пакоя, так і падагрэву вады для цялят. Глядзіць за ёй вартаўнік Уладзімір Рубніковіч.
Адразу пасля заканчэння навучальнай установы прыйшла на ферму “Маркі” Альфрэда Рубніковіч: спачатку ў якасці лабаранткі і вось ужо тры дзясяткі гадоў нязменная загадчыца, хаця дасягнула пенсіённага ўзросту. У свой час за высокія паказчыкі калектыў фермы быў узнагароджаны тэлевізарам за перамогу ў абласным спаборніцтве. Падчас тарнада жанчына не дайшла да фермы ўсяго некалькі дзясяткаў метраў, пабудовы рушыліся на яе вачах. Атрымала такі стрэс, што давялося месяц быць на бальнічным.
А вось даглядчык жывёлы Расціслаў Кабак, які падмяніў сямнаццаць гадоў таму на ферме сваіх бацькоў, знаходзіўся ў момант стыхіі ў самім памяшканні. Як уцалеў, да гэтай пары не можа ўцяміць. Абыйшоўся траўмамі сярэдняй ступені рукі і галавы. Даглядае цялят Расціслаў на пару з Канстанцінам Абрамчыкам, які раней быў слесарам.
Калектыў фермы задаволены працай у новых умовах, а дырэктар гаспадаркі Багуслаў Паўлоўскі і будаўнікі ўпэўнены, што ніякі тарнада не зможа пашкодзіць гэты трывалы надзейны аб’ект.
saulich@bk.ru
Фота аўтара
