Якія памылкi робяць нашы экспарцёры?

Прададзенаму верыць

Аналітыкі прагназуюць, што да 2020 года гадавы абарот сусветнага лідара электроннай камерцыі — кампаніі Alibaba Group — дасягне 950 мільярдаў долараў. Здавалася б, чаму гэтая лічба павінна хваляваць беларускіх экспарцёраў? Справа ў тым, што для нашых вытворцаў створаны свой аналаг «алібабы». Абноўлены партал Export.by ужо ў гэтым годзе можа стаць паўнавартаснай пляцоўкай электроннага гандлю. Праўда, стваральнікі сайта прызнаюць: не ўсе кампаніі гатовыя развіваць экспарт і асвойваць новыя рынкі дзякуючы перадавым тэхналогіям.

Абноўлены партал Export.by ужо ў гэтым годзе можа стаць паўнавартаснай пляцоўкай электроннага
Фота primgazeta.ru

Пытаннi маркетынгавай актыўнасцi вытворцаў, перспектывы асваення рынку трэціх краін і гандлёвыя «войны» з Расіяй — гэтыя пытанні мы абмеркавалі з дырэктарам Нацыянальнага цэнтра маркетынгу і кан’юнктуры цэн (НЦМіКЦ) Валерыем САДОХАМ.

— Валерый Яўгенавіч, сітуацыя з расійскімі партнёрамі цяпер не самая простая. І тым не менш заўсёды атрымлівалася так, што менавіта суседні рынак у грашовым выражэнні для нашых экспарцёраў быў найбольш выгадным. Шматлікія вытворцы заточаныя выключна пад расiйскага спажыўца, ім вельмі складана пераарыентавацца на іншыя рынкі.

— Рэаліі такія, што сёння большая частка нашага экспарту трапляе ў Расію. З аднаго боку, гэта перавага, з другога — недахоп. Перавага ў тым, што расійскі рынак даволі вялікі, зразумелы, няма моўнага бар’ера ў камунікацыях. Аднак гэты рынак мяняецца, паколькі змянілася структура ўласнасці ў Расіі: у свой час так званая чэкавая прыватызацыя стварыла шмат розных алігархічных структур, якія валодаюць не толькі пабудаванымі ў СССР прадпрыемствамі, але і прыроднымі рэсурсамі.


З’яўленне такіх структур, а таксама розных саюзаў вытворцаў тавараў і прадаўцоў уносіць, мякка кажучы, нестабільнасць на расійскім рынку не толькі для беларускіх тавараў. Саюзы вытворцаў цукру, малака, збожжа і іншыя, падобныя да іх, зацікаўлены ў памяншэнні прапаноў на рынку, бо гэта забяспечыць павышэнне цэн і адпаведна прыбыткаў. Усе гэтыя фактары мы павінны правільна ацаніць і выпрацаваць стратэгію дыверсіфікацыі. Калі сёння складваецца больш спрыяльная сітуацыя для прасоўвання нашых тавараў у краіны Еўропы, то ёсць неабходнасць не толькі думаць пра гэты рынак, але больш дэталёва вывучаць яго, праводзіць маркетынгавыя даследаванні тавараў і канкурэнтаў, надаваць увагу рэкламе, займацца сертыфікацыяй.

Вялікі аб’ём расійскага рынку быў сур’ёзным стрымліваючым фактарам і як бы перашкодай для пошуку новых напрамкаў у Азіі, Афрыцы, Лацінскай Амерыцы. Сёння пытанне дыверсіфікацыі стаіць вельмі востра і патрабуе ад усіх удзельнікаў экспартнай дзейнасці вычарпальных мер па папулярызацыі беларускіх тавараў на сусветным рынку. Таму прадпрыемствам трэба знаходзіць спецыялістаў з ведамі азіяцкіх моў, здольных эфектыўна наладжваць дзелавыя сувязі. А што тычыцца цанавога пытання, экспарцёры павінны шчыра адказаць сабе, што для іх важней — кошт або стабільнасць паставак.

— Якія асноўныя бар’еры, на ваш погляд, перашкаджаюць беларускім кампаніям выходзіць на новыя рынкі? І чаму некаторыя экспарцёры не праяўляюць цікавасці да партала Export.by, нават нягледзячы на тое, што прасоўванне з дапамогай гэтай пляцоўкі цалкам бясплатнае?

— Пералічу бар’еры. Гэта недахоп вопыту работы на знешніх рынках, слабая інфармаванасць аб нашых таварах за межамі СНД, няведанне сучаснай спецыфікі маркетынгавай палітыкі, нізкая зацікаўленасць прадпрыемстваў у замежных выставах. Да таго ж,  многія  супрацоўнікі знешнегандлёвых службаў прадпрыемстваў дрэнна валодаюць замежнымі мовамі.

Акрамя таго, для выхаду на замежныя рынкі неабходны істотныя матэрыяльныя выдаткі, у тым ліку на правядзенне маркетынгавых кампаній, стварэнне сэрвісных цэнтраў, прадстаўніцтваў, сумесных вытворчасцяў. Аднак планы многіх экспарцёраў накіраваны ў асноўным на замацаванне на расійскім рынку. А каб асвоіць напрамкі за межамі СНД, патрабуецца праводзіць больш агрэсіўную маркетынгавую палітыку. Пакуль жа многія прадпрыемствы, на жаль, не разумеюць, што для іх існуе рэальная магчымасць прадэманстраваць свой тавар замежным пакупнікам праз каталогі на партале Export.by без якіх-небудзь фінансавых выдаткаў.

— Валерый Яўгенавіч, скажу шчыра: уражанне ад некаторых узораў, прадстаўленых у каталогах, не самае прыемнае. Якасць асобных фатаграфій дрэнная, дзе-нідзе адсутнічае рэальная цана і няма апісання ўмоў продажу. Хто рэагуе на такую рэкламу?

— На жаль, многія прадпрыемствы не паказваюць пры рэгістрацыі асноўныя звесткі пра тавары і паслугі, абмяжоўваючыся, як правіла, агульнымі характарыстыкамi. Напрыклад, цана — «дагаворная», умовы дастаўкі — «самавываз». У падобных выпадках прадпрыемствы не могуць выклікаць сур’ёзную цікавасць у патэнцыяльных замежных імпарцёраў.

Праблемай з’яўляецца і тое, што экспарцёры не ўсюды забяспечваюць належную якасць лагатыпаў таварных знакаў. Часцяком адсутнічае інфармацыя аб міні-мальным аб’ёме заказу, упакоўцы і ўмовах дастаўкі, цане тавараў (паслуг), не ў поўным аб’ёме прадстаўляецца інфармацыя аб рынках прысутнасці, якія цікавяць гандлёвыя прадстаўніцтвы кампаній. Параўнальна невялікая колькасць кампаній запаўняе звесткі на англійскай мове. Усё гэта стрымлівае працэс стварэння паўнавартаснага інфармацыйнага рэсурсу па падтрымцы экспарту, якім закліканы стаць партал Export.by.

Акрамя таго, на мой погляд, пры адсутнасці цаны, калі прадпрыемства робіць спасылку «цана дагаворная», з’яўляецца магчымасць непразрыстасці гандлёвых здзелак, і, як вынік, ствараецца глеба для злоўжыванняў. Гэта таксама можа негатыўна адбіцца на развіцці дыстрыбутарскай сеткі беларускіх экспарцёраў за мяжой і спрыяць рээкспарту айчынных тавараў фірмамі-рээкспарцёрамі. Для ператварэння партала ў адну з асноўных «кропак уваходу» для замежных імпарцёраў на беларускі рынак, безумоўна, важна забяспечыць паўнату і актуальнасць прадстаўленай экспарцёрамі інфармацыі. У гэтай сувязі НЦМіКЦ працягне аказваць карыстальнікам кансультацыйную падтрымку пры ўнясенні ў рэгістрацыйную форму ўсіх неабходных звестак, а таксама забяспечыць развіццё і ўдасканаленне тэхнічных магчымасцей партала.

ДАВЕДАЧНА

Сёння на партале Export.by прадстаўлены звесткі больш чым пра 10 тысяч нашых кампаній-экспарцёраў. Штодзённая наведвальнасць: 3 тысячы ўнікальных наведвальнікаў. Партал цікавы для кампаній з Расіі, Украіны, Казахстана, ЗША, Германіі, Латвіі, Індыі, Польшчы, Літвы, Кітая, Вялікабрытаніі, Узбекістана, Турцыі, Малдовы, Нігерыі, Кыргызстана, Італіі, Францыі, Грузіі, Ірана, Азербайджана, Арменіі.

konoga@sb.by

Полная перепечатка текста и фотографий запрещена. Частичное цитирование разрешено при наличии гиперссылки.
Заметили ошибку? Пожалуйста, выделите её и нажмите Ctrl+Enter