Інспектар інспекцыі нагляду і прафілактыкі Барысаўскага ГРАНС Вадзім ЦІмаховіч скрупулёзна сочыць за выкананнем гаспадарамі правілаў пажарнай бяспекі.
Падчас падамавога абходу інспектары не прапусцяць нікога. У першую чаргу правяраюць сем’і, якія знаходзяцца ў сацыяльна небяспечным становішчы, і шматдзетныя сем'і, адзінокіх людзей. У разгар будзённага дня многія дамы на замках, усе на працы, да таго ж шмат дачнікаў жыве ў аграгарадку. Таму па выхадных — дадатковыя абходы.
На двары брэша сабака. Яго гаспадар рамантуе старэнькі Фольксваген. Называемся і просім паказаць дом.
— На печцы нічога не захоўваеце? — пачынае аглядаць дом Вадзім Цімаховіч. — Бачу, ёсць прытопачны ліст ля печкі, гэта добра.
З другога пакоя выглядаюць дзеці, ім цікава, што за людзі ў форме прыйшлі да іх дадому. Дзядуля загадвае ім не выходзіць.
— Колькі ў хаце дзяцей пражывае? — працягвае інспектар.
— Пяць, мы нядаўна пераехалі, — дарэчы, гэта прыкметна: пярэдні пакой завалены рэчамі.
— Памятаеце, нельга пакідаць дзяцей адных, — нагадвае простыя правілы Вадзім Цімаховіч. — Так, трэба наводзіць тут парадак, а вось і плафона няма на лямпачцы.
Інспектар звяртае ўвагу на печ, адлегласць ад яе ўнутранага боку да столі. Трэба збоку выкласці пару цаглін, каб печ блізка не прымыкала.
— Калі будзеце рабіць рамонт, звярніце ўвагу і на праводку, яна павінна быць у корабах, — новая заўвага ад інспектара.
— У металічным, — з веданнем справы кажа і гаспадар дома.
— А комін як даўно чысцілі? Ён пабелены?
— Даўно... не пабелены, — шчыра прызнаецца той.
— Ведаеце, што з запалкамі гуляць нельга? — звяртаецца да маленькіх жыхароў дома Вадзім Цімаховіч.
— Будзе пажар, непрыемнасці, — ціха прамовіла старэйшая з «квінтэта».
— А куды трэба тэлефанаваць у выпадку пажару? — цэлая віктарына ад інспектара.
— У 101, тата распавёў, — ужо гучна і ганарліва дэкламавала дзяўчынка.
За правільны адказ — размалёўка. Усім натоўпам пабеглі яе разглядаць. Мы заўважылі кучу недакуркаў на верандзе. Дзядуля сарамліва апускае вочы.
— Паліце толькі на вуліцы, дрэнна затушыце цыгарэту, будзе бяда, — інспектар выпісвае рэкамендацыі па ліквідацыі недахопаў. Па гэтым адрасе ён яшчэ вернецца.
У другім доме жыве ветэран. Двор пакошаны. Ля адрыны акуратна складзены нарыхтаваныя да зімы дровы. На парозе сустракае сівавалосы дзядок, але салдацкую выпраўку гады не сцерлі. Уладзіміру Пятровічу 92, з трэцім Беларускім фронтам дайшоў да Кенігсберга, а з першым Украінскім — да Берліна. У прасторным доме чыста і светла. На століку фатаграфіі дзяцей і ўнукаў.
— Сацработнікі дапамагаюць па хаце, — тлумачыць Уладзімір Пятровіч.
Інспектар звярнуў увагу на фіранкі да печы.
— Калі распалю печ — прыбяру іх, — кажа ветэран.
На столі пажарны апавяшчальнік.
— Ён не працуе, — уздыхае гаспадар дома.
Прычына непаладкі простая — села батарэйка. Вадзім Цімаховіч прынёс з машыны новую і замяніў яе. У цэлым жа, у ветэрана ў доме з пажарнай бяспекай усё добра.
ikras@sb.by