Пра што папярэджвае «Варажбітка» і якія задачкі рашае «Выдатніца»?
Не толькі містыка
«Варажбітка» — 16-серыйная гісторыя аб нечаканым партнёрстве маскоўскага следчага, які шмат пабачыў у сваім жыцці, і дзяўчыны з экстрасэнсорнымі здольнасцямі.Галоўныя героі серыяла — цынічны сталічны дэтэктыў Аляксей Патапаў і правінцыялка Люся, у якой пасля смерці сястры адкрываюцца экстрасэнсорныя здольнасці. На першы погляд, яны дзіўная пара: следчы прывык верыць толькі неабвержным доказам і фактам, а Люся нічога не разумее ў следчай працы. Але гэты тандэм нечакана эфектыўна раскрывае самыя заблытаныя злачынствы, і Патапаву даводзіцца прызнаць, што ўяўленні Люсі прыносяць карысць следству.
Нягледзячы на наяўнасць містыкі, «Варажбітка» — гісторыя пра людзей і іх пачуцці. Акрамя расследавання злачынстваў, па адным на кожную серыю, у гераіні завязваюцца асабістыя адносіны з начальнікам. У своеасаблівым любоўным трохкутніку, акрамя Патапава і Люсі, аказваецца нявеста Аляксея крыміналіст Марына, з самага пачатку яна ўспрымае правінцыялку, якая з’явілася з ніадкуль, як саперніцу.
У галоўнай ролі — Кацярына Олькіна, тэлегледачы памятаюць яе па рэтрасазе «Сямейны альбом», меладраме «Двайное жыццё» і крымінальным дэтэктыве «Аднойчы ў Растове». Следчага Аляксея Патапава, які скептычна адносіцца да дару галоўнай гераіні і яе ўдзелу ў расследаваннях, сыграў Міхаіл Парэчанкаў («Механічная сюіта», «Паддубны», «Ліквідацыя»). Дарэчы, па іроніі лёсу акцёр спрабаваў сябе ў ролі тэлевядучага менавіта на шоу «Бітва экстрасэнсаў», але, як і яго персанаж, захаваў
недавер да ўладальнікаў паранармальных здольнасцей.
Справа была ў Ленінградзе
У закручаным сюжэце шматсерыйнага рэтрадэтэктыва «Выдатніца» знойдзецца месца і крыміналу, і сямейным таямніцам, і здрадзе, і каханню.1958 год. Галоўная гераіня, выпускніца ўніверсітэта Маша Крапівіна, паступае на службу ў Ленінградскі крымінальны вышук. Дзяўчына з інтэлігентнай сям’і, яна настолькі даверлівая і наіўная, што новыя калегі — дасведчаныя аператыўнікі, якія прайшлі вайну і пабачылі жыццё, асабліва сышчык Шведаў, спачатку не ўспрымаюць яе ўсур’ёз. Аднак менавіта Крапівінай адзін са злачынцаў раптам паведамляе важную інфармацыю — на першым жа допыце бандыт заяўляе, што ў аддзяленні дзейнічае «крот».
Кадр з серыяла «Выдатніца».
Як зразумець, хто кажа праўду, а хто вядзе сваю гульню? Учарашняй студэнтцы юрфака даводзіцца расследаваць забойствы, рабаванні, падпалы і ўзброеныя налёты, весці допыты і ў кожнай справе даказваць калегам сваю прафесійную вартасць. Канцэнтравацца на працы перашкаджаюць няпростыя асабістыя адносіны з двума операмі — Маша не можа вызначыцца, хто ёй падабаецца больш, і разабрацца ў любоўным трохвугольніку выдатніцы будзе няпроста. А ў дадатак да ўсяго расследаванне, якое яна вядзе, адкрывае нязручную праўду пра яе ўласную сям’ю.Машы трэба будзе самастойна разблытаць цэлы клубок таямніц. Высветліць, ці ўсе людзі вакол яе — тыя, за каго сябе выдаюць. І зрабіць гэта прыйдзецца як мага хутчэй. Бо, відаць, на новага супрацоўніка крымінальнага вышуку бандыты ўжо адкрылі паляванне.
Галоўную ролю крыміналіста Машы Крапівінай выконвае актрыса Яна Гладкіх. Таксама ў фільме здымаліся Мікіта Яфрэмаў, Аляксандр Яцэнка, Юлія Аўг, Ігар Скляр, Таіса Вілкава, Алена Коранева і іншыя.
Ірына ЮР’ЕВА.