— Гісторыя пра драўляную ляльку, якая стала чалавекам, сёння асабліва актуальная. Мы ўсе робім памылкі, але, выпраўляючы іх, расцём. Так і Пінокіа, часам спатыкаючыся, усё ж такі прыходзіць да таго, што ахвяруе сабой у імя іншага чалавека.
Для беларускай пастаноўкі дырыжор Уладзімір Авадок і кампазітар Глорыя Бруні шукалі найлепшую форму і, здаецца, знайшлі. У мастацкім афармленні пастаноўшчыкі абяцаюць жывапісныя дэкарацыі, яркія касцюмы, выкарыстанне відэапраекцыі і мультыплікацыйны рад. Важна, што ў новай пастаноўцы Вялікага тэатра змогуць прыняць удзел і маладыя артысты. Аб’яўлены кастынг салістаў на галоўныя партыі. Канкурсанты павінны закончыць музычныя вышэйшыя навучальныя ўстановы (ці яшчэ навучацца ў іх) альбо працаваць ў прафесійных музычных тэатрах ці канцэртных арганізацыях і жыць у Мінску.
Тых, хто пажадае прыняць удзел у кастынгу, просяць запоўніць анкету з сайта bolshoibelarus.by і да 27 жніўня даслаць яе разам са сваім фотаздымкам на адрас competition@bolshoibelarus.by. Кастынг пройдзе 5 верасня ў сценах Вялікага тэатра Беларусі.
