“Уладары” ўжо выйшлі ў паўфінал. А пачыналася ўсё ў 1997 годзе. Тады ў органах унутраных спраў пачалі ствараць мастацкія калектывы — каб служба не толькі была суровымі буднямі, але і трохі здавалася “мёдам”. Фактычна людзям у пагонах дазволілі легалізаваць розныя хобі. Не сакрэт, многія міліцыянеры любяць спяваць. Аказалася, не толькі на прафесійную тэматыку. Таму спачатку спеўны гурт супрацоўнікаў Ваўкавыскага аддзела дэпартамента аховы МУС называўся строга — “Салдаты парадку” з адпаведным рэпертуарам. Летась песня “Мой салдат” гэтага калектыву заняла першае месца на гала-канцэрце, які праводзіла Міністэрства абароны. Амаль адразу ж пасля перамогі міліцыянеры аб’ядналіся з аматарамі народнай творчасці з гарадскога Дома культуры — так узнікла група “Уладары”. Змяніўся і рэпертуар: да міліцэйскіх дадаліся народныя песні.
Адзін з тых, хто спяваў у “Салдатах парадку” ад самага пачатку, — Анатоль Вялешка, памочнік камандзіра ўзвода Ваўкавыскага аддзела дэпартамента аховы. Музычны дар адкрыў у сабе выпадкова.
— Неяк сабраліся з калегамі адзначыць свята, і сам не заўважыў, як пачаў спяваць, — успамінае Анатоль. — А цяпер думаю — ад мамы гэта маёй. Яна з Палесся. Я заўсёды чуў ад яе тамтэйшыя мелодыі. Вось толькі каб самому заспяваць — доўга не мог адважыцца. Усё ж, калі ўвесь час ходзіш у форме, яна дысцыплінуе, не дае расслабіцца. А каб заспяваць — трэба “пераўвасобіцца” ў цывільнага чалавека, стаць “простым хлопцам”.
“Уладары” не сумняваюцца: перамога будзе за імі. Іначай і быць не можа — імя абавязвае.