Тэндар Міністэрства культуры на вытворчасць біяграфічнага фільма пра лідара легендарнага ансамбля «Песняры» выйграла айчынная прыватная кінакампанія, якая працавала над «Слядамі апосталаў». Частку вытворчасці возьме на сябе расійская фірма — стваральнік папулярных фільмаў «Халоп», «Тэкст» і серыяла «Кухня», паведамляе tvr.by.
Фільм будзе складацца з 8 серый і ахопіць дзяцінства, сталасць, першыя крокі ў музыцы і здабыццё папулярнасці Уладзіміра Мулявіна. Тэрмін вытворчасці карціны — 15 месяцаў. Большасць здымак — каля 80% — плануецца правесці на тэрыторыі Беларусі. Новы праект ацэньваюць амаль у 5 мільёнаў беларускіх рублёў, два з іх пакрые рэспубліканскі бюджэт.
Працоўная назва фільма — «За полчаса до весны». Так называецца адна з песень, якую выконваў ансамбль «Песняры». Яна была напісана кампазітарам Оскарам Фельцманам на словы Навума Олева ў 1976 годзе. Дарэчы, музыку Мулявіна ў фільме збіраюцца пераагучыць. Мяркуецца, яе выканаюць «Беларускія песняры». Вядома, што праектам ужо зацікавіліся замежныя тэлеканалы.
mila@sb.by