Песня на выбыванне

Суцэльнае расчараванне. Чым здзівіў адбор фіналістаў на “Еўрабачанне”

Аўтар хіта «П’янае сонца» хоча прадстаўляць нашу краіну на «Еўрабачанні».
Праслухоўванне да нацадбору на «Еўрабачанне» Белтэлерадыёкампанія даўно ператварыла ў атракцыён. Па сутнасці, каманда прафесіяналаў у кулуарах магла б выбіраць фіналістаў, але тут хочуць рабіць усё празрыста, а таму запрашаюць усіх, чые заяўкі адпавядаюць умовам, і вядуць анлайн-трансляцыю на ўвесь свет. Чым цяперашняе шоу адрознівалася ад папярэдніх? Зноў амаль сотня прэтэндэнтаў. Праўда, дзіўных персанажаў усё менш, але і годных — раз-два і аблічыўся.

З першай жа хвіліны праслухоўвання хацелася пашкадаваць журы. У гэтым годзе яго склад быў нечаканым: толькі адзінкі з тых, хто лёсавызначальнае рашэнне прымаў раней. На чале — заслужаны артыст Беларусі Валерый Дайнека, побач Дзяніс Дудзінскі, Вольга Вронская, Вікторыя Алешка і іншыя знаёмыя выканаўцы. У прынцыпе, давяраць ім можна. Хоць не давала спакою думка: як яны, напрыклад, не прапусцяць у фінал тую ж Жанет – тысячу ж гадоў знаёмыя. Тут можна апусціць пералік усіх выступоўцаў і адразу перанесціся на сем гадзін наперад. З вячэрняга выпуску навін стала вядома: Жанет не прапусцілі ў фінал. І гэта здавалася правільным: на гэты раз спявачка неяк нядбайна паставілася да конкурсу. Такіх, дарэчы, было многа. А некаторыя наогул проста пераацэньваюць свой талент і магчымасці.

Па правілах, журы магло выбраць да пятнаццаці фіналістаў, але наскрэблі толькі адзінаццаць. Чыя персона выклікае сумненні, дык гэта той самы ўкраінскі спявак Alekseev, які стаў зоркай пасля выканання «П'янага сонца». Матывы гэтага хіта былі і ў песні, якую ён падрыхтаваў да «Еўрабачання». Праўда, у Белтэлерадыёкампаніі дагэтуль толкам не вызначыліся, ці выконвалася гэтая песня да 1 верасня — гэта значыць, парушыў ён правілы адбору ці не? Але справа нават не ў гэтым. Яго апраўданне: «Лічу сябе беларускім выканаўцам, таму што тут ведаюць і любяць мае песні» — наўрад ці цягне на тое, каб гэты чалавек прадстаўляў нашу краіну на прэстыжным конкурсе. Але ў любым выпадку журы залік за тое, што ўзялі хлопца ў фінал: рэйтынгі шоу забяспечаны.

Чыя персона ні хвіліны не выклікала сумнення — Гюнеш. Яна наўмысна прыйшла на праслухоўванне апошняй, каб паставіць у ім тлустую кропку. І паставіла. Калі яна папрасіла Аляксеева, які выступаў якраз перад ёй, дапамагчы вынесці ёй чамадан-крэсла на сцэну, гэта выглядала прыблізна так: ты, хлапчук, ведай сваё месца. І Гюнеш была цудоўнай. Не ў звыклых для яе строгіх і пафасных строях, а ў стыльным паліто, рваных джынсах і красоўках. Да голасу і песні, прынамсі, таксама няма ніякіх прэтэнзій. Артыстка прама сказала: «Я прыйшла на адбор толькі за перамогай», і ў гэтым мала хто сумняваецца.

Наўрад ці памылюся, але Вользе Шыманскай у гэтым годзе, мяркуючы па ўсім, зноў прыйдзецца застацца за спінай пераможца. Здалося, салістка Napoli як быццам і сама гэта добра разумее. Таму не стала прыдумляць экстравагантных убораў, а прыйшла на адбор у сціплай чорнай вопратцы. Хоць яе кампазіцыя і зусім іншая, але па ўзроўні не ніжэй за песню Гюнеш.

Чакана трапіла ў фінал і пратэжэ Пятра Ялфімава — расійская выканаўца Соф'я Лапіна. Але, па-першае, дзяўчына хоць і добрая, ды яшчэ зусім маладая, а па-другое... Слухайце, хлопцы: украінец, расіянка — ці не занадта шмат прыезджых у фінале? Ёсць адчуванне, што групу Shuma ўзялі туды менавіта таму, каб у шоу прыўнесці хоць нешта беларускае.

Здзівіў на праслухоўванні  кампазітар Яўген Алейнік. Ён нечакана для ўсіх скалаціў бойз-бэнд. І што дзіўна, сабраў не юнакоў, а паспяховых артыстаў на чале з салістам Вялікага тэатра Аляксандрам Гелахам. І не пралічыўся. Яго група Adagio ў фінале.

Аляксандра Ткач, Кірыл Гуд (ён жа Кірыл Ермакоў), Анастасія Малашкевіч, Alen hit (ён жа Алег Шукці) і група «Радыёхваля» — моладзь з нядрэннымі галасамі і цікавымі кампазіцыямі, для каго ўдзел у фінале — гэта выдатная магчымасць нагадаць пра сваё існаванне і займець новых прыхільнікаў. Цяпер — месяц падрыхтоўкі, шліфоўкі нумароў і вакальныя практыкаванні. Плануецца, што фінал нацыянальнага адбору адбудзецца 16 лютага. Ён, як звычайна, пройдзе ў фармаце тэлевізійнага канцэрта. Удзельнік фіналу, які набраў найбольшую колькасць балаў па выніках галасавання прафесійнага журы і галасавання гледачоў, і будзе прадстаўляць Беларусь на «Еўрабачанні».

Наталля ІВАНОВА

Полная перепечатка текста и фотографий запрещена. Частичное цитирование разрешено при наличии гиперссылки.
Заметили ошибку? Пожалуйста, выделите её и нажмите Ctrl+Enter
Загрузка...
Новости