Вядучы шоу Аляксандр Найдзёнаў.Шоу складаецца з 5 інтэлектуальных этапаў і супергульні. Колькасць удзельнікаў памяншаецца ў матэматычнай рэгрэсіі. З 50 прэтэндэнтаў толькі для аднаго гульня можа скласціся ўдала, усе астатнія — на вылет.
На час здымак новага праекта студыя «600 метраў» Белтэлерадыёкампаніі ператварылася ў імправізаваны тэрмінал аэрапорта. Удзельнікі шоу не толькі ўбачылі рух аблокаў у ілюмінатарах, лічбы, якія загараюцца на табло, стрэлкі-ўказальнікі, але і адчулі нервовае напружанне, як тыя, хто рыхтуецца да вылету і чакае свайго рэйсу.
У ігракоў будзе ўсяго некалькі імгненняў, каб без разваг даць адказ на адно пытанне. Суровы вядучы — бескампрамісны інтэлектуал Аляксандр Найдзёнаў — не дазволіць расслабіцца і падумаць, а словы «Пачакайце, я гэта дзесьці чытаў... Хвіліначку, зараз успомню!» ніяк на яго не дзейнічаюць.
Удзельнікі праекта «На вылет!».У другі тур праекта выходзяць 16 удзельнікаў, якія далі правільны адказ. Яны падзяляюцца на дзве каманды, таму ў студыі — два калідоры для праверкі, як у аэрапорце. Прэтэндэнты на перамогу праходзяць не мытны кантроль, а правяраюць веды. Запальваецца зялёнае святло — значыць, адказ правільны, чырвонае — каманда пазбаўляецца аднаго ўдзельніка, якога выбіраюць сапернікі.
Заданні ў ходзе шоу могуць здацца гледачам вельмі простымі, але ў час супергульні пераможцу трэба будзе адказаць на адно з трох самых складаных пытанняў. Калі гэта яму не ўдасца, то на ўсе тры пытанні можа адказаць удзельнік, які першым выбыў з гульні, і тады менавіта ён забярэ ўсе прызы сабе!
Эфір — 31 сакавіка ў 10.45.
Ірына ЮР’ЕВА
