У мінскім Палацы мастацтва сёння зноў пачынае працу буйнейшая ў краіне выстава-продаж «Восеньскі салон з Белгазпрамбанкам». Шырокая панарама творчасці маладых мастакоў сёлета прадстаўлена ў другі раз, і ў параўнанні з мінулым годам маштабы і якасны ўзровень арганізацыі мерапрыемства значна выраслі.
«Эльф», Ганна Дыдышка.
У экспазіцыі цяперашняга салона будуць дэманстравацца каля 500 мастацкіх твораў. Куратар праекта «Арт-Беларусь» Аляксандр Зіменка сцвярджае: прадстаўлены ўсе віды і жанры выяўленчага мастацтва за выключэннем хіба відэа-арта і перформансаў. Напрамкі — ад класічных пейзажаў і нацюрмортаў да самых авангардных аб`ектаў і інсталяцый.
Значна вырасла і колькасць удзельнікаў. Калі летась іх было 90, цяпер — больш за 160 мастакоў ва ўзросце ад 18 да 40 гадоў, адабраных прафесійным журы. У складзе экспертаў, якім трэба будзе вызначыць лепшых аўтараў, — прызнаныя прафесіяналы ў галіне сучаснага мастацтва міжнароднага ўзроўню з Расіі, Украіны, Германіі, Літвы, у ліку якіх і госця з Францыі скульптар Сільвія Кашлін, прэзідэнт «Восеньскага салона» ў Парыжы.
Менавіта магчымасць прадставіць свае работы ў Францыі, на міжнародным «Восеньскім салоне», які пройдзе на Елісейскіх Палях у кастрычніку 2017 года, стане галоўнай узнагародай для пераможцаў. Гэта навінка ў фармаце сёлетняга мерапрыемства: на першым салоне ўручаліся тры грашовыя прэміі лепшым маладым мастакам, цяпер увага звернута на дапамогу ў прасоўванні іх творчасці за мяжой.
«Абдымкі», Васіль Цімашоў, Паліна Пірагова
Пацвярджэннем далейшага развіцця плённых сувязей паміж Мінскам і Парыжам стане выстава, якая дапоўніць вернісаж, — свае творы пакажуць сучасныя французскія аўтары, прызёры знакамітых «Восеньскіх салонаў» апошніх гадоў.
Леташняя мінская выстава-продаж здзівіла наведвальнікаў высокімі цэннікамі.
Былі работы, якія каштавалі і звыш 300, і звыш 500 мільёнаў рублёў да дэнамінацыі. Самым дарагім з набытых твораў стала скульптура з бронзы, прададзеная за 264 мільёны недэнамінаваных рублёў. Самым бюджэтным апынуўся фотаздымак, які знайшоў уладальніка за паўтара мільёна недэнамінаваных рублёў.
Як цэны ў гэты раз? Розныя ёсць і цяпер, згаджаецца Аляксандр Зіменка і ўдакладняе, што вызначаць кошт — права аўтара, калі той упэўнены, што за такія грошы яго работу могуць купіць. Але разам з тым досыць дарагія, як і ў мінулым годзе, скульптуры. Гэта звязана ў першую чаргу з тым, што матэрыялы і адліўка, асабліва бронзы, каштуюць дорага. А ў цэлым, лічыць суразмоўнік, работы ёсць на любы кашалёк, і кошт іх у гэты раз усё ж бліжэй да рынкавага.
«Беларускі міфалагічны персанаж», Антон Шпіца
Дарэчы, азнаёміцца з прапанаванымі творамі і іх коштам можна на сайце artcenter.by, які працуе паралельна з выставай-продажам. Там жа ў інтэрнэт-краме можна і пакупку зрабіць.
Выстава-продаж будзе працягвацца па 30 кастрычніка. Час працы — з 11.00 да 20.00 штодня, без выхадных.
Даведка
Першы мінскі «Восеньскі салон» прайшоў у кастрычніку—лістападзе 2015 года. З экспазіцыяй тады азнаёміліся больш за дзесяць тысяч чалавек, было прададзена каля сотні выстаўленых работ — 30% ад агульнай колькасці. Яркі поспех натхніў арганізатараў зрабіць выставы-продажы твораў маладых мастакоў штогадовымі.
svirko@sb.by
