Першага лістапада ў літургіі Рымска-каталіцкага касцёла адзначаюць урачыстасць усіх святых. Другога лістапада — усіх памерлых вернікаў, гэта значыць тых, хто яшчэ патрабуе духоўнага ачышчэння і пакуль не з’яўляецца святым. Пакуль мы жывём на зямлі, мы не ведаем лёс нашых памерлых, таму можам узгадваць у малітве кожнага, каго з намі ўжо няма.
Часам мы не можам прыехаць на могілкі менавіта другога лістапада, таму дапускаецца рабіць гэта ў бліжэйшы зручны дзень — часта вернікі робяць гэта ў выхадныя дні ў пачатку лістапада. У некаторых сітуацыях людзі прыходзяць на могілкі ў той дзень, калі святары запрашаюць мясцовых вернікаў сабрацца разам на малітву і благаславенне магіл.
На пачатак лістапада прыпадае бацькоўская субота, калі праваслаўныя таксама адведваюць магілы сваіх блізкіх. Таму гэта пара ў нашай краіне для католікаў і праваслаўных з’яўляецца часам асаблівай памяці пра памерлых. Яна выражаецца ў клопаце пра месца пахавання нашых блізкіх, малітве асабістай і малітве падчас літургіі.
У католікаў пераважае традыцыя прасіць духавенства служыць літургію за памерлых не менш чым пяць разоў у год: пры пахаванні памерлага, на сёмы дзень пасля смерці, на трыццаты дзень, у кожную гадавіну пасля смерці і другога лістапада, калі ўзгадваюцца ўсе памерлыя вернікі.
Касцёл вельмі просіць сваіх вернікаў не зладжваць застоллі на могілках. Сярод праваслаўнага духавенства гэты звычай таксама выклікае здзіўленне. Няхай могілкі будуць месцам цішыні, павагі, роздуму і малітоўнай памяці. Спажыванне ежы і піццё алкаголю не пасуе да гэтага святога месца.
Прыгожымі і натуральнымі сімваламі памяці пра памерлых, якія можам узяць з сабой на могілкі, з’яўляюцца свечка і жывыя кветкі. Свечка азначае нашу гарачую веру на сустрэчу з тымі, хто закончыў свой зямны шлях, а жывыя кветкі — гэта наша жывая памяць пра памерлых.
Ксёндз Кірыл Бардонаў
Памяць пра памерлых
Полная перепечатка текста и фотографий запрещена. Частичное цитирование разрешено при наличии гиперссылки.