Минск
+11 oC
USD: 2.04
EUR: 2.28

Сезон студотрядов открыт: юноши и девушки, не дожидаясь лета, уже приступили к работе

Лета пачынаецца ў маі

У гэтым годзе ў студ­атрадах па ўсёй краіне задзейнічаюць больш за 25 тысяч маладых людзей. Большасць з іх пазнаёмяцца з рабочымі прафесіямі толькі пасля заканчэння летняй сесіі ў каледжах і ВНУ, але некаторыя ўжо пачалі зараб­ляць грошы. Першыя студ­атрады адкрыліся ў Гродне. «Р» даведалася, як юнакам і дзяўчатам удаецца сумяшчаць вучобу і працу.

Праца ў хлопцаў пыльная: яны дапамагаюць супрацоўнікам ААТ «Дарожнабудаўнічы трэст № 6».

Ініцыятыўныя маладыя людзі адправіліся на свае першыя працоўныя месцы раней, чым звычайна. Прычыны ва ўсіх розныя: адны імкнуцца правесці вольны час з карысцю і зарабіць грошай, іншыя ідуць па вопыт. Сферы работ самыя розныя: можна быць важатым у лагеры, удзельнічаць у экалагічнай экспедыцыі, дапамагаць ва ўборцы ўраджаю, рэканструкцыі і будаўніцтве дарог... Увогуле, кожны можа знайсці занятак па душы. Адзін з асноўных напрамкаў студатрадаў у гэтым годзе — сэрвісны.

— Працуем у дзве змены. Вучобе гэта ніяк не перашкаджае, мы ўмудраемся ўсё сумяшчаць, — Віялета Сытая ненадоўга перапыняе працу, каб з намі пагутарыць. Камандзір атрада «Янкі» на базе ГрДУ імя Янкі Купалы расказвае: юнакі і дзяўчаты зарабляюць тым, што рэгіструюць абітурыентаў на цэнтралізаванае тэсціраванне. У атрадзе ёсць дасведчаныя ў гэтай галіне студэнты, але і пачаткоўцаў хапае. У любым выпадку кожнага з іх папярэдне навучалі.

— Ахвотных тут працаваць шмат, канкурэнцыя вялікая. Заробак я, як і іншыя студатрадаўцы, хачу выдаткаваць на летні адпачынак, — тлумачыць Віялета.

Такія ж планы і ў байцоў будаў­нічага атрада. Яго камандзір Арцём Кушнірук дзеліцца, на што ўдзельнікі яго каманды патрацяць атрыманыя грошы:

— У нас працуюць толькі хлопцы. Натуральна, многія хочуць адвучыцца ў аўташколе, купіць аўтамабіль. Заробкі пойдуць у асноўным на гэтыя мэты. Грошы будзем адкладваць і на падарожжа. Справа ў тым, што гэтым летам мы павінны добра адпачыць — у наступным годзе трэба абараняць дыплом, неабходна назапасіць сіл.

Дзмітрый ЛЕБЯДЗЕВІЧ, Арцём КУШНІРУК і Мікіта БУБНОЎ заяўляюць: праца нялёгкая, але прыбытковая.

Праца ў хлопцаў пыльная: яны дапамагаюць супрацоўнікам ААТ «Дарожна-будаўнічы трэст № 6». Занятыя ўстаноўкай тратуарных бардзюраў і не толькі: носяць пясок, выконваюць загрузку і разгрузку грузавых машын і іншае. Студатрадаўцы дружна заяўляюць: праца нялёгкая, але прыбытковая.

А на пляцоўках вытворцы аўтамабільных кампа­нентаў ААТ «Белкард» ін­шы атрад задзейнічаны ў добраўпарадкаванні тэрыторыі. Арцём Гніцэвіч, майстар вытворчага навучання УА «Гродзенскі дзяржаўны політэхнічны каледж», запэўнівае — студэнты працай вельмі задаволеныя:

— Мы яшчэ толькі прыступаем да абавязкаў, усе поўныя энтузіязму. Студатрадаўцы рады, што ў іх ёсць унікальная магчымасць атрымаць не толькі вопыт, але і нядрэннае грашовае ўзнагароджанне.

У гэтым сезоне маладыя людзі больш выбіраюць працу ў сферы будаўніцтва, сельскай гаспадаркі, педагогікі і экалогіі. Першыя студатрады ўжо дзейнічаюць, але шанц знайсці сваю вакансію яшчэ ёсць — запісацца ў шэрагі байцоў можна да пачатку чэрвеня. Варта паспяшацца — жадаючых хапае. Дарэчы, летась на часовую працу адправіліся больш за 26 тысяч маладых людзей: 24 тысячы з іх працавалі ў 1,8 тысячы атрадах, больш за 2 тысячы — індывідуальна. Усяго з 2003 года, калі ў краіне адрадзілі студатрадаўскі рух, у розных прафесіях змаглі сябе паспрабаваць каля мільёна чалавек.

Дарэчы, неўзабаве да працы прыступіць і моладзь Міншчыны. У цэнтральным рэгіёне створаць амаль 140 студэнцкіх атрадаў для больш чым 3 тысяч чалавек. Заяўкі на працаўладкаванне падалі ўжо больш за 2,5 тысячы чалавек. Многія з іх імкнуцца патрапіць на галоўную гарадскую маладзёжную будоўлю — трэцюю лінію Мінскага метрапалітэна. Але колькасць месцаў абмежавана: там будуць працаваць 120 чалавек. Першы сакратар Мінскага гарадскога камітэта БРСМ Сяргей Клішэвіч дзеліцца падрабязнасцямі:

— Ужо сёння мы пачынаем фарміраваць атрад на конкурснай аснове. Акрамя студэнтаў нашых ВНУ, задзейнічаем моладзь з Санкт-Пецярбурга. Байцам трэба будзе выконваць земляныя і бетонныя работы, вязку арматуры.

Статус Усебеларускай маладзёжнай будоўлі ў гэтым годзе прысвоены сацыяльным аб’ектам у Астраўцы. Запланавана будаўніцтва шматфункцыянальнага спартыўнага комплексу, крытай лядовай пляцоўкі, школы, бальніцы, дзіцячага сада і аўтавакзала. Ужо да 2020 года колькасць насельніцтва горада павялічыцца ўдвая: перш за ўсё гэта звязана са з’яўленнем атамнай электрастанцыі. Дарэчы, з 2014 года аб’ектам БелАЭС таксама прысвоены статус Усебеларускай маладзёжнай будоўлі.

У гэтым сезоне ў юнакоў і дзяўчат адкрываецца шмат новых перспектыў і магчымасцей. Так, каля 300 байцоў задзейнічаюць на II Еўрапейскіх гульнях у Мінску — гэта вельмі прэстыжная праца. Праявіць сябе студэнты змогуць не толькі ў нашай краіне: геаграфія студатрадаўскага руху пастаянна пашыраецца. Так, маладыя людзі працуюць па ўсёй Расіі: ад Санкт-Пецярбурга да Заходняй Сібіры. Адточваюць прафесійныя навыкі ў Польшчы. А ў мінулым годзе ўпершыню сельскагаспадарчыя атрады адправіліся ў Малдову.

Другі сакратар ЦК ГА «БРСМ» Алег Дзікун анансаваў:

— Усе гэтыя напрамкі будуць запатрабаваныя і ў гэтым сезоне. Прычым у Малдове, акрамя працы на вінаградніках, разглядаецца магчымасць арганізацыі будаўнічага і вытворчага атрадаў. Прапрацоўваецца новы напрамак — Калінінград. У нашых студэнтаў ёсць магчымасць папрацаваць і ў Казахстане. Сельскагаспадарчыя атрады адправяцца нават у Грузію.


Полная перепечатка текста и фотографий запрещена. Частичное цитирование разрешено при наличии гиперссылки.
Заметили ошибку? Пожалуйста, выделите её и нажмите Ctrl+Enter
5
Загрузка...