Пачуйце, як гучыць вясна

Меламаны ў чаканні: хутка пачнецца міжнародны музычны фестываль “Мінская вясна”

Меламаны ў чаканні пачатку аднаго з найстарэйшых у краіне, сёлета ўжо 34-га па ліку міжнароднага музычнага фестывалю. Штогод «Мінская вясна» становіцца падзеяй яркай і захапляльнай, а зараз будзе яшчэ і асабліва насычанай: нязменная сцэнічная пляцоўка форуму — Белдзяржфілармонія — адзначае 80-годдзе. На працягу двух месяцаў у яе залах прагучыць музыка самая розная, і, як заўсёды, збяруцца лепшыя выканаўцы з усяго свету.

Фота Артура ПРУПАСА

Адкрые форум выдатны піяніст з Кітая Джэ Юэн — выпускнік знакамітай Джульярдскай школы (ЗША), уладальнік мноства ўзнагарод і прызоў, атрыманых на самых прэстыжных фартэпіянных конкурсах. Малады і вядомы музыкант выступае на ўсіх пяці кантынентах. У гэтым сезоне ў яго графіку 128 канцэртаў у 12 краінах і больш чым у 80 гарадах. 12 красавіка — у Мінску. У суправаджэнні нашага сімфанічнага аркестра Джэ Юэн сыграе Чайкоўскага і Шастаковіча. Прыхільнікі класікі ў прыемным прадчуванні — леташняе выступленне піяніста тут стала сапраўдным адкрыццём і сенсацыяй.

Адзін з выдатных флейтыстаў сучаснасці Рафаэле Трэвізані прыедзе ў Мінск упершыню. Знатакоў яго ігра захапляе асаблівай энергетыкай і ўнікальнасцю гучання. Маэстра правядзе майстар-клас у Акадэміі музыкі, пакажа свае надзвычай дарагія флейты, а ў філармоніі выканае шэдэўры італьянскай класікі з піяністкай Паолай Жырардзі.

На Міжнародную акадэмію аркестравага мастацтва ў Мінск чакаюць сузор’е славутых музыкантаў-віртуозаў, ураджэнцаў нашай краіны, якія працуюць у вядучых аркестрах свету. Кларнетыстаў Яўгена Ягудзіна і Аляксандра Фітарштэйна — з Ізраіля і ЗША, трубача Андрэя Кавалінскага — з Францыі. Выдатную кампанію дапоўніць літовец Сергеюс Кірсенка. Уявіце, імклівы «Палёт чмяля» ён выконвае на тубе, «суровы» гук і габарыты якой не могуць не ўражваць!

Аляксандр Журбін — імя добра вядомае. Расійскі кампазітар — аўтар шэрагу опер, балетаў, музыкі да дзясяткаў кінафільмаў, мюзіклаў і песень. Першая ў СССР рок-опера «Арфей і Эўрыдыка» — яго сачыненне. Пастаўленая ў 1975-м, яна да гэтага часу з поспехам жыве на сцэне. У Мінску на творчым вечары мэтра адбудуцца першае выкананне яго Сімфоніі № 2 і сусветная прэм’ера новага твора — Канцэрта для цымбалаў і сімфанічнага аркестра. Фрагменты з мюзіклаў, песні і рамансы прагучаць таксама. Імёны салістаў у афішы зоркавыя — Аксана Волкава, Наталля Гайда, Уладзімір Пятроў. 

У лютым 50-годдзе адзначыў наш Дзяржаўны камерны аркестр. Яўген Бушкоў — яго мастацкі кіраўнік і галоўны дырыжор — аднагодак калектыву, свой юбілей адзначыць у дні фестывалю. Зразумела, на сцэне і з прэм’ерамі. За апошнія 10 гадоў, якія ўзначальвае аркестр, без гэтага не абыходзіцца ні адзін канцэрт. Па сакрэце: для маэстра напісаны два новыя сачыненні, прысвечаныя яму.  Не выключана, што ў адным з іх пачуем і яго сола на скрыпцы.

Яшчэ адзін двайны майскі юбілей — асабістае 70-годдзе і 35-годдзе з часу прызначэння мастацкім кіраўніком філармоніі — адзначыць на фестывалі заснавальнік «Мінскай вясны», вядомы піяніст і педагог Юрый Гільдзюк. На канцэрт збяруцца яго цяперашнія і колішнія вучні, сябры-музыканты, якія працуюць па ўсім зямным шары. У ліку іх з-за мяжы, каб павіншаваць свайго шаноўнага настаўніка, прыедуць славутыя Андрэй Сікорскі і Андрэй Паначэўны — адны з самых таленавітых нашых піяністаў, выхаванцаў Юрыя Мікалаевіча.

Памятаеце, у знакамітым фільме Шцірліц вывеў для сябе: лепш за ўсё запамінаецца апошняя фраза. Дык вось, напрыканцы самае важнае: галоўная інтрыга фестывалю — прэм’ерны музычны спектакль «Плошча Якуба Коласа» Ларысы Сімаковіч. Унікальны твор, незвычайная дзея, сучасны харавы тэатр. 

Вы да гэтага часу думаеце, што акадэмічная музыка — гэта сумна? Проста вы не спрабавалі яе слухаць. Не абмініце пачаць разам з «Мінскай вясной». Сустракаемся ў філармоніі?

svirko@sb.by



Полная перепечатка текста и фотографий запрещена. Частичное цитирование разрешено при наличии гиперссылки.
Заметили ошибку? Пожалуйста, выделите её и нажмите Ctrl+Enter
Загрузка...