Адкрые праграму спектакль “ГЭТАМЫ” маладога ўкраінскага рэжысёра Стаса Жыркова. Пастаноўка цікавая не толькі тым, што была пачата на майстар-класе ў межах Міжнароднай тэатральнай акадэміі ў Мюнхене, дзе Стас Жыркоў выкладаў беларусам. Але і тым, што ў яе аснове ляжыць нашумелая кніга Андрэя Горвата “Радзіва “Прудок”. Тэатралам, якія бачылі работу Рамана Падалякі ў Купалаўскім тэатры, напэўна будзе цікава пазнаёміцца з яшчэ адной сцэнічнай інтэрпрэтацыяй горватаўскага твора. Цікава, што сёлета на форуме будуць прадстаўлены яшчэ дзве работы Жыркова: 22 сакавіка гледачы ўбачаць спектакль “Паляванне на сябе” Рэспубліканскага тэатра беларускай драматургіі, а 27 сакавіка — пастаноўку Адэскага акадэмічнага ўкраінскага музычна-драматычнага тэатра імя В. Васылька “Яна яго кахала”. Дарэчы, апошні спектакль створаны паводле п’есы маладога беларускага драматурга Андрэя Іванова.
У сёлетней праграме нямала пастановак, народжаных у межах міжнароднага супрацоўніцтва. Да прыкладу, 22 сакавіка магілёўскім тэатралам пакажуць “Дванаццатую ноч”, пастаўленую беларускім рэжысёрам Міхаілам Лашыцкім на сцэне грузінскага Тэлаўскага дзяржаўнага прафесійнага драматычнага тэатра імя Важа-Пшавела. 23 сакавіка на сцэне абласнога тэатра будзе ісці спектакль малой формы “А мы адзін для аднаго — цені”. Гэта сумесная работа прыднястроўскага рэжысёра, балетмайстра, артыста Дзмітрыя Ахмадзіева і ізраільскай актрысы Ганны Гланц-Маргуліс.
Асаблівы акцэнт на форуме будзе зроблены на пластыцы і харэаграфіі. Заслугоўваюць увагі монаспектакль “Сібір” Тэатра (не) нарматыўнай пластыкі з Санкт-Пецярбурга, смелая пастаноўка “Голы кароль” Дзяржаўнага даўгаўпілскага тэатра і іншыя работы.
Гледачоў чакае нямала сюрпрызаў, актуальных тэм, нечаканых форм. Традыцыйна ў межах форуму будзе працаваць Майстэрня маладой рэжысуры, пройдуць майстар-класы для маладых акцёраў, запланаваны абмеркаванні прагледжаных спектакляў.