Сёння «Камволь» зацікаўлены ў пашырэнні аб’ёмаў вытворчасці, а адпаведна і ў наборы новых кадраў.
Уладкавацца за адзін прысест
Кадравая служба «Камволя» расчыніла дзверы для беспрацоўных а 10-й гадзіне. Знайсці аддзел кадраў прадпрыемства даволі проста — лiтаральна некалькі крокаў налева ад прахадной. Ахоўнік дапамагае на словах зарыентавацца. Праз нейкую хвіліну апынулася ва ўтульным кабінеце.
— Я скончыў геаграфічны факультэт БДУ. Па спецыяльнасці — інжынер. Можа, знойдзецца для мяне месца? — у голасе мужчыны ва ўзросце, які задае пытанне кадравiкам, адчуваецца надзея.
— На жаль, нічым не можам вам дапамагчы. Інжынерных вакансій па вашым профілі ў нас няма. Патрабуюцца ў асноўным рабочыя, — неспадзявана расчароўвае кадравік.
Мікалай Алегавіч не страчвае надзеі знайсці працу па спецыяльнасці — сёння ж паедзе ў БНТУ і Белгідраметэацэнтр. Калі нічога не атрымаецца, абяцае вярнуцца — можа, i сапраўды настае час перапрафiлявання?
«Камволь» — найбуйнейшы вытворца тэкстыльнай прадукцыі ў краіне. Прадпрыемства займаецца поўным цыклам вытворчасці, пачынаючы з перапрацоўкі шэрсці ды вырабу пражы і заканчваючы выпускам тканіны і пастаўкай прадукцыі ў краіны СНД і Заходняй Еўропы. А значыць, майстры тут патрэбныя па ўсiх спецыяльнасцях…
— Знаёмства з пэўным прадпрыемствам мы пачынаем з міні-ярмарак вакансій, якія рэгулярна праходзяць у аддзяленнях абслугоўвання грамадзян. У сярэднім на такія мерапрыемствы завітвае да нас каля 10—15 чалавек. А на прадпрыемства даязджаюць непасрэдна тыя людзі, хто сапраўды зацікавіўся нашай вытворчасцю і хоча пазнаёміцца з рабочым месцам знутры, — тлумачыць прынцып дзеяння кіраўнік аддзела па рабоце з наймальнікамі ўпраўлення занятасці насельніцтва камітэта па працы, занятасці і сацыяльнай абароне Мінгарвыканкама Алена Мядзведзь. — Тады чалавек прыязджае адразу з пашпартам і працоўнай кніжкай, і калі ён падыходзіць пад патрабаванні кадравай службы і кіраўніка пэўнага падраздзялення, накіроўваецца на медагляд.
Упершыню шырокая iнфармацыя пра мадэрнізацыю i абсталяванне прадпрыемства новай сучаснай тэхнікай прайшла ў лістападзе мінулага года. Хутка каля дзвярэй аддзела кадраў «Камволя» выстраілася чарга з чатырох дзясяткаў чалавек. Па праўдзе кажучы, насельніцтва вельмі зацікавілася шчырай прапановай «Камволя»: ёсць магчымасць набыць разрад ці кваліфікацыю на месцы.
Пасля мадэрнізацыі на прадпрыемстве з’явіліся новыя рабочыя месцы.
Каля сотні вольных месцаў
У Зінаіды Падалякінай сёння першы дзень, калі яна пачала працаваць самастойна, без памочніка. Дагэтуль яна два месяцы вучылася на прадпрыемстве ў больш вопытных калег прадзільнай справе.
— Вакансію мне прапанавалі ў цэнтры занятасці, вырашыла паспрабаваць, — дзеліцца сваёй гісторыяй 43-гадовая жанчына. — Калі шчыра, мне тут падабаецца, працаваць вельмі цікава. А галоўнае, ты ўсведамляеш сваю значнасць, бо вось з гэтых нітак зроблена маё і ваша адзенне. Канешне, праца сама па сабе амаль ювелірная, патрабуе пільнай увагі і цярплівасці.
Абноўленае прадпрыемства стала больш кампактным. Зараз усе цэхі знаходзяцца ў адным будынку, раней жа былі раскіданы па ўсёй тэрыторыі. Сёння «Камволь» зацікаўлены ў пашырэнні аб’ёмаў вытворчасці, а адпаведна і ў наборы новых кадраў. Тым больш прадпрыемства пераходзіць з дзвюх на тры працоўныя змены.
З верасня сюды ўладкаваліся на працу каля 160 чалавек. Сёння адкрытымі застаюцца яшчэ каля сотні вакансій. Сярод іх найбольш актуальныя — гэта ткачы, прадзільшчыкі, аператары грэбенечасальнага абсталявання, слесар па рамонце і абслугоўванні кампрэсарных установак, запраўшчыкі, здымшчыкі пражы і шмат іншых.
— Больш за ўсё мы маем патрэбу ў спецыялістах рабочых спецыяльнасцей, таму што асноўная мэта прадпрыемства сёння — павелічэнне аб’ёмаў вытворчасці, — расстаўляе акцэнты намеснік генеральнага дырэктара па кіраванні персаналам і ідэалогіі ААТ «Камволь» Алена Пляскова. — Сярод спецыялістаў з вышэйшай адукацыяй нам патрэбны інжынерна-тэхнічныя кадры, праўда, з пэўным стажам і з вузкай кваліфікацыяй. Гэта інжынеры-тэхнолагі (тэкстыльшчыкі). Сорак нашых спецыялістаў зараз вучацца на завочным аддзяленні і атрымліваюць вышэйшую адукацыю. Таксама мы маем патрэбу ў перакладчыках, якія валодаюць турэцкай мовай. Справа ў тым, што ў нас заключаны дагавор з буйной турэцкай кампаніяй на ўкараненне сістэмы аўтаматызаванага кіравання вытворчасцю. Перакладчыкаў мы ўладкоўваем не на пастаяннай аснове, а толькі на час перагавораў.
У работадаўца не надта катэгарычныя патрабаванні да жадаючых уладкавацца на «Камволь». Галоўнае, мець жаданне і добрае здароўе. Справа ў тым, што працаваць даводзіцца з пылам, які нябачны і сам па сабе не адчуваецца.
Читайте также
Большасць спецыялістаў прадпрыемства ААТ «Камволь» у сувязі з умовамі працы маюць ільготы па выхадзе на пенсію. Таксама грунтоўнай сацыяльнай гарантыяй для іншагародніх становіцца атрыманне месца ў інтэрнаце. А такіх на прадпрыемстве — палова. Дарэчы, сярэдні заробак тут — больш за 650 рублёў.
Падобныя дні прадпрыемстваў сталічнае ўпраўленне занятасці праводзіць рэгулярна і з самымі рознымі арганізацыямі. Сярод іх — ААТ «Белкамунмаш», «Мінскі завод аўтаматычных ліній імя П.М. Машэрава», «Мінскрамбуд», «Мінскпраектмэбля» і іншыя. Таму дастаткова ўважліва сачыць за графікам і актыўна ўдзельнічаць. У такім выпадку шанец знайсці працу па душы павялічваецца.
veronulas@sb.by
Фота БЕЛТА.
