Як паведамляе belarusfilm.by, у конкурсную праграму кароткаметражных анімацыйных фільмаў уключана работа Ірыны Тарасавай «263 ночы». Гэта сумесны праект Беларусі, Расіі і Ізраіля. У цэнтры ўвагі — рэальная гісторыя групы з 26 яўрэяў, якія ў страшныя гады вайны спрабавалі выжыць у выкапаным склепе. Яны правялі пад зямлёй 263 ночы... Аўтар сцэнарыя Канстанцін Андрушачкін, мастак-пастаноўшчык Ганна Емяльянава, кампазітар Юрый Павалоцкі, гукарэжысёр Віктар Морс. У ролі апавядальніка за кадрам — народны артыст Расіі Арыстарх Ліванаў. Мультфільм зняты паводле літаратурнага твора Барыса Герстэна.
Ёсць у праграме фестывалю яшчэ адзін праект, у стварэнні якога прымалі ўдзел беларусы. Гэта добра вядомы фільм Вадзіма Перэльмана «Урокі фарсі». Галоўны герой карціны — бельгіец яўрэйскага паходжання Жыль Крэм’е, які, патрапіўшы ў канцлагер, выдае сябе за перса і такім чынам пазбягае расстрэлу. Як паведамляе сайт фестывалю miamijewishfilmfestival.org, фільм пакажуць на вечары закрыцця, які ўпершыню ў гісторыі форуму выпадае на Міжнародны дзень памяці ахвяр Халакосту.
mila@sb.by
