Сёлетні Х рэгіянальны фестываль «Гальшанскі замак» пройдзе 18 мая і, відаць, запомніцца гасцям надоўга. Справа не толькі ў абноўленай Паўночнай вежы, якую ўбачаць наведвальнікі, але і насычанай праграме.
Напачатку фестывальнага дня гасцей чакае тэатралізаваны пралог «Сапега праз стагоддзі вітае гасцей». Урачыстае адкрыццё свята, паведамляюць арганізатары, пачнецца з дэгустацыі знакамітага гальшанскага перніка і выступлення гурта «Стары Ольса». Далей дзённую праграму працягнуць тэатралізаванае коннае шоу «Крылатая слава Гальшанскіх зямель», турніры лучнікаў з выкарыстаннем 3D мішэняў, паказальныя выступленні клуба гістарычнай рэканструкцыі, рыцарскія турніры і бугурты, майстар-класы па старажытных танцах і рамёствах.
Упершыню на тэрыторыі замка будзе арганізавана сетка інтэрактыўных пляцовак «Гетманскі стан». Рэканструктары правядуць экскурсію і раскажуць пра жыццё і побыт сярэдневяковага чалавека. Госці змогуць наведаць пляцоўкі «Школа маладога байца», «Рыцарскія стайні», «Школа фехтавання», «Палявы шпіталь», «Рамеснікі» і іншыя.
Вулічны тэатр «Вір», які прыедзе ў Гальшаны са сталіцы, навучыць жадаючых хадзіць на хадулях, а вечарам пакажа фаер-спектакль Іgnis Vestae. Удзельнікаў вячэрняй праграмы фестывалю чакае таксама незабыўная музычная імпрэза вядомых гуртоў сярэдневяковай музыкі «Літы талер», Nevrida і Pawa. Напэўна, зацікавіць гасцей і 3D mapping show — на абноўленай Паўночнай вежы замка ажыве гісторыя таямнічых Гальшан. Такога на фестывалі яшчэ не бачылі.
mila@sb.by
